Primeiru Ministru, Taur Matan Ruak.Imajen/Antonio Goncalves

DILI, 18 maiu 2020 (TATOLI)–Primeiru-Ministru (PM) Taur Matan Ruak husu ba povu Timor-Leste atu kontinua hala’o servisu hanesan baibain no husik lider sira mak buka solusaun ba problema politika rai laran.

‘Husik ami boot sira mak ko’alai hodi buka solusaun ba problema politika no povu kiik sira ne’e tuur hakmatek iha fatin, halo servisu hanesan bai-bain, lalika preokupa, timor tenke ba oin,” dehan Xefe Governu Taur Matan Ruak ba jornalista sira hafoin hala’o enkontru semanál ho Prezidente Repúblika (PR), Francisco Guterres “Lú Olo”, iha Palásiu Prezidensiál Bairru Pité, Dili, segunda ne’e.

Taur fó hanoin fali ba populasaun sira atu lembra de’it liafuan ne’ebé nia sempre ko’alia katak ema boot sira hemu tua, kiik sira labele lanu.

“Hau fó hanoin fali ha’u-nia liafuan ida famozu,  kuandu ha’u ba iha suku sira, ha’u ko’alia katak ema boot sira hemu tua, kiik sira labele lanu,” PM Taur hameno.

Eis Prezidente Repúblika ne’e mós fó atensaun nafatin katak laiha ema ida mak iha intensaun atu sobu nasaun ne’e. Tanba iha ema ruma hanoin atu sobu nasaun ne’e, ema ne’e sei halo problema ho povu Timor-Leste.

“Sira ne’ebé mak iha hanoin ida ne’e, sira sei iha problema ho ita povu timor.  Tanba ita lakohi, ita hakarak ita-nia rai ne’e ba oin. Ita hotu buka esforsu,  hahú kedan husi Prezidente Repúblika, ba to’o ita-nia oan sira ne’ebé sei bebé. Ita tenke hanoin ida-ne’e. Katak, problema ne’ebé mak ita iha, ita tenke hakat liu problema sira ne’e atu ita bele hetan solusaun ba dezenvolvimentu ita-nia nasaun,” PM Taur subliña.

Lider másimu VIII governu ne’e hatene, Timor Leste iha problema rua ne’ebé tenke tau atensaun maka’as.

“Ida mak, moras COVID ne’e, ida seluk mak oinsá mak ita bele rekupera lalais ita-nia ekonomia. Osan ba bolsu traballadór sira laiha. Ba familia sira laiha. Sasán folin laiha. Ida-ne’e mak problema boot,” nia hateten.

Tanba ne’e, Taur hateten, oras ne’e tenke luta maka’as atu kombate buat rua ne’e liuliu buka Oinsá traballadór sira bele hetan fali osan, taxi sira bele halai fila-fali hanesan baibain, nune’e bele hetan osan. Atu nune’e, nia dehan, família sira bele servisu fila-fali hanesan baibain.

Notísia Relevante: Hakarak Lori Fila OJE 2020-2021, Taur Dezeja PN Funsiona Lalais

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here