Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 18 maiu 2020 (TATOLI)—Vise-Prezidente Parlamentu Nasionál, Deputada Maria Angelina Sarmento Lopes, husu Prezidente Parlamentu Nasionál (PPN), Arão Noé de Jesus da Costa Amaral, atu justifika razaun la ajenda pedidu destituisaun liuhosi plenária.

“Ajenda ba ohin loron la ilegál, prezidente parlamentu ne’ebé paraliza ajenda ida-ne’e mak illegal. Aktu invazaun hosi deputadu CNRT sira ba iha meza parlamentu ne’e signifika sira laiha ona argumentu forte. Sira só bele halo ho violénsia de’it ona. Ho violénsia de’it sira manán hodi gaña simpatia. Se iha razaun karik tanbasá la mai tuur iha plenária hodi halo debate ho argumentu,”  dehan Deputada Maria Angelina Sarmento Lopes ba jornalista sira, iha Parlamentu Nasionál, segunda ne’e.

Deputada PLP ne’e konsidera deputadu CNRT ataka ho violénsia signifika razaun lakon ona no legalidade mós laiha ona.

“Se sira invade nafatin meza, ami sei hola asaun ne’ebé sériu katak hakarak ka lakohi husu intervensaun polísia nian tanba invade meza ho ilegál. Deputadu sira-ne’ebé kaer metin fatin prezidente parlamentu nian, vise-prezidente no sekretária meza sira, ne’e sira halo ona krime ida tanba sira invade meza, ne’ebé tuir loloos la’ós deputadu sira-nia kompeténsia,” nia dehan.

Vise-Prezidente PN ne’e hatutan, prezidente parlamentu rasik impede funsionamentu normál parlamentu nian tanba rejimentu fó dalan ba destituisaun.

Hatán ba kestaun ne’e, Xefe Bankada CNRT, Duarte Nunes, afirma meza ne’e CNRT prontu fó maibé tenke formaliza bloku hodi forma IX Governu.

“Se atu mai hadau de’it ne’e ami mós la fó fatin tanba atu troka meza ne’e presiza eleisaun ba prezidente no vise-prezidente sira, la’ós ko’alia iha dalan mai troka de’it, ne’e labele. Presiza bloku ida hodi apoia Governu IX, se formaliza hotu ona, CNRT sei la kaer metin,” nia dehan.

Notísia Relevante: CNRT Propoin Líder Bankada Parlamentár Tuur Hamutuk

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here