Primeiru-Ministru, Taur Matan Ruak. Imajen Tatoli/ Egas Cristovão

DILI, 18 maiu 2020 (TATOLI)–Primeiru-Ministru (PM) Taur Matan Ruak hakarak atu lori fila Orsamentu Jerál Estadu (OJE) ba tinan 2020 no mós tinan 2021, nune’e hanesan xefe Governu dezeja ba deputadu sira atu hetan lalais solusaun hodi funsiona hikas atividade Parlamentu Nasionál (PN).

Taur Matan Ruak ko’alia asuntu ne’e, hafoin enkontru semanál ho Prezidente Repúblika (PR), Francisco Guterres “Lú Olo”, iha Palásiu Prezidensiál Bairru Pité, Dili.

“Ne’e sira órgaun Estadu ketak ida. arlamentu ne’e só Deputadu sira mak ko’alia. Hosi Governu, ha’u dezeja de’it tenke hetan solusaun ida lais tanba ami mós haruka lei barak ba. Ami hakarak lori fila fali orsamentu 2020, 2021. Ida ne’e mak importante,” dehan Xefe Governu Taur Matan Ruak ba jornalista sira.

Xefe Governu ne’e apela ba deputadu sira iha uma fukun Parlamentu Nasionál atu fó sira-nia kontribuisaun, hodi bele la’o ba oin tanba Timor-Leste tenke ba oin.

“Tanba ne’e mak ha’u apela ba Deputadu sira hotu atu fó sira-nia kontribuisaun, nune’e ita bele la’o ba oin. Lalika lakon tan ita-nia tempu,” Primeiru-Ministru hateten.

Entretantu, Timor Leste ninia Orsamentu Jerál Estadu (OJE) ba tinan 2020, xumba iha Parlamentu Nasionál, iha diskusaun jeneralidade, ne’ebé difikulta mós nasaun ne’e kontinua moris ho orsamentu duodésimu to’o ohin loron.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here