Traballadór sira hatun foos iha Portu Dili. Imajen Tatoli/António Gonçalves

DILI, 18 maiu 2020 (TATOLI) – Hafoin Governu liuhosi reuniaun Konsellu Ministru aprova pakote sosio-ekonómiku durante Estadu Emerjénsia ligadu ho prevensaun ba surtu COVID-19, iha pakote ne’e inklui mós medida ida ba distribuisaun sasán esensiál sira, ne’ebé sei halo importasaun foos hamutuk tonelada 30.000 hodi reforsa stock nasionál.

Prezidente Sentru Lojístika Nasionál (CLN, sigla portugés), Agusto Junior Trindade, informa prosesu akizisaun foos tonelada 30.000 husi Vietname mai Timor-Leste daudaun ne’e iha ona faze finalizasaun.

“Agora daudaun tama ona iha prosesu aprovizionamentu iha Komisaun Nasionál Aprovizionamentu (CNA, sigla portugés), tanba  kuaze parte husi Sentru Lojístiku Nasionál ramata ona“, dehan Dirijente ne’e ba Agência Tatoli iha ninia knaar fatin, segunda ne’e.

Parte aprovizionamentu finaliza ona draf kontratu no sei haruka ba Vietname.

“Nune’e sira haree kuandu loos ona entaun Governu rai rua bele asina iha tempu badak no Vietname hahú halo ona importasaun foos mai Timor-Leste. Agora prosesu iha ona CNA, ita hotu espera ohin draf kontratu ne’e haruka ona ba Vietname”, Agosto Junior akresenta.

Notísia Relevante: Governu Sei Importa Foos Tonelada 30.000 Reforsa Stock Nasionál

Tuir karta husi Governu Vietname katak bainhira konklui ona kontratu maka sei importa foos iha tempu badak.

“Bainhira ita aselera kontratu ne’e lalais, entaun iha fulan oin foos to’o ona tanba trasportasaun ne’e han tempu loron 10 to’o 15, entaun ita presiza aselera lalais kontratu sira ne’e atubele fulan oin to’o ona mai”, dehan Agosto Junior.

Bazeia ba nota verbál ne’ebé Embaixadora Timor-Leste iha Vietname haruka mai Ministériu Komérsiu Industria (MTKI) iha loron 25 marsu 2020, hetan ona resposta husi Governu Viername rasik katak sira loke fali ona odomatan atu hatama foos ba Timor-Leste.

“Ita iha ona akordu anteriór sira iha momentu ne’ebá, nune’e sira rasik indika kedan kompañia estatál ida atu fornese foos mai ita”, nia salienta.

Nia dehan, Timor-Leste agradese ba kooperasaun tanba Governu Vietname bele loke sira-nia odamatan.

“Ita agradese tanba Governu Vietname bele loke sira nia odamatan mai ita, tanba sira taka ona desde loron 24 marsu no parte ita-nia liuhosi Ministériu Negósiu Estrajeiru Kooperasaun (MNEK) nia, servisu maka’as tebes hodi konsege lobi sira”, nia subliña.

Entertantu, prosesu ba akizasaun foos ne’e rasik, hahú iha 24 abríl 2020 bainhira Konsellu Ministru deside hodi hatun despasu ba CLN hodi kompra foos tonelada 30.000 husi Vietname.

Hahú husi ne’e, CLN submete ba kedan CNA hodi halo sira nian papél nu’udar aprovizionamentu nian atu halo esbosu kontratu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here