Traballadór sira hatun foos iha Portu Dili. Imajen Tatoli/António Gonçalves

DILI, 22 abríl 2020 (TATOLI) – Hafoin Governu liuhosi reuniaun Konsellu Ministru aprova pakote sosio-ekonómiku durante Estadu Emerjénsia ligadu ho prevensaun ba surtu COVID-19, iha pakote ne’e inklui mós medida ida ba distribuisaun sasán esensiál sira, ne’ebé sei halo importasaun foos hamutuk tonelada 30.000 hodi reforsa stock nasionál.

“Distribuisaun ka apoiu ba sasán esensiál sira, Governu sei importa foos tuir nesesidade nasionál nian ba fulan-tolu, ne’ebé Governu sei sosa foos ne’e ho aprosimadamente hamutuk tonelada 30.000-resin”, informa Ministru Koordenadór Asuntu Ekonómikum interinu, FIdelis Manuel Leite Magalhães iha nia knaar fatin, Palásiu Governu, kuarta ne’e.

Tuir governante ne’e katak, foos ne’ebé Governu sei importa la’ós fahe de’it ba komunidade maibé atu reforsa stoke nasionál iha Sentru Lojistiku Nasionál (CLN, sigla portugés).

Maibé atuál Ministru Reforma Lejizlativa Asuntu Parlamentár ne’e dehan, durante implementasaun Estadu Emerjénsia Governu iha medida relasiona ho foos ninian.

“Governu iha medida tolu, ida mak iha situasaun a’at loos ona Governu bele halo fó apoiu diretu ba sidadaun, maibé bainhira situasaun seidauk a’at loos, maka Governu bele halo medida ruma, inklui fa’an ba púbiku atubele hatún presu no komunidade bele sosa iha situasaun defísil nia laran. Entaun Governu bele halo intervensaun merkadu, intervensaun merkadu ne’e bele halo diretu tanba CLN hanesan empreza públika ka Governu liuhosi CLN bele fa’an filafali foos ba ita-nia setór privadu sira”, esplika Ministru Fidelis.

Daudaun ne’e fonte ba Governu atu sosa foos iha rejiaun oras ne’e mós komesa redús ona tanba nasaun importadór sira barak maka taka ona sira ninia merkadu, maibé entre Governu ho Govenu sei bele.

Kona-ba kualidade ba foos importadu, Ministru adianta katak iha konfirmasaun husi misaun diplomátiku sira liuhosi Ministériu Negosiu, Estranjeiru no Kooperasaun (MNEK) katak nasaun rua ka tolu maka prontu atu fó esesaun ba Timor-Leste.

“Antes ne’e hanesan Vietname halo ona desizaun atu labele esporta foos ba rai-li’ur, maibé nia iha tiha ona akordu ida ho Timor-Leste ne’ebé asina iha 2010, no ita-nia diplomasia iha li’ur mós halo servisu kontaktu ho sira no sira informa mai katak iha ona dalan ba sira atu halo esesaun ba Timór. Hanesan mós ho Kambodia, buat ne’ebé mak bele halo maka relasaun entre Governu ba Governu atubele foti husi ne’ebá maski sira taka dalan ba kompra husi setór privadu, maibé Governu ho Governu iha dalan”, nia subliña.

Entretantu nasaun ne’ebé sei importa foos mai Timor-Leste mak Kambodia, no Vietname.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here