Deputadu Arão Noé de Jesus da Costa Amaral. Imajen /Egas Cristóvão

DILI, 18 maiu 2020 (TATOLI)—Prezidente Parlamentu Nasionál, Arão Noé de Jesus da Costa Amaral, konsidera Vise-Prezidente Parlamentu Nasionál, Deputada Maria Angelina Sarmento Lopes, viola Konstituisaun RDTL, Lei Orgnizasaun Funsionamentu Administrasaun Parlamentár (LOFAP), Kódigu Penár no Rejimentu Parlamentu Nasionál (RPN).

“Ohin, há’u, Prezidente Parlamentu Nasional hakarak informa ba públiku kona-ba tentativa hadau Prezidente Parlamentu nia podér ne’ebé halo hosi Vise-Prezidente Parlamentu Nasionál, Deputada Maria Angelina Lopes Sarmento. Aktu sira-ne’e konsidera nu’udar hahalok hadau podér ne’ebé kontra Konstituisaun Repúblika, Kódigu Penál, Rejimentu Parlamentu Nasionál no Lei Organizasaun Funsionamentu Administrasaun Parlamentar. Ha’u fó sai katak, ohin laiha plenária maibé kontinua hein Prezidente Repúblika halo disolusaun ba Parlamentu Nasionál,” Arão Noé informa ba jornalista sira liuhosi Konferénsia Imprensa iha Parlamentu Nasionál, segunda ne’e.

Arão Noé afirma aktu sira-ne’ebé konsidera nu’udar tentativa hadau podér, relasiona iha loron 13 maiu 2020 Bankada Fretilin, PLP, no Khunto dirije rekerimentu Distituisaun Prezidente Parlamentu Nasional ba fali Vise-Prezidente Parlamentu Nasionál.

“Aktu ida-ne’e viola KRDTL artigu 99 (3), Rejimentu Parlamentu Nasionál artigu 17 kona-ba kompeténsia Prezidente Parlamentu Nasionál tanba Konstituisaun artigu 99 (3) hateten momoos katak Parlamentu Nasionál reuni ordinariamente tuir konvokasaun Prezidente Parlamentu nian,” nia dehan.

Tanba ne’e, Vise-Prezidente Parlamentu Nasionál, Maria Angelina Lopes Sarmento, nia aktu sira-ne’e viola KRDTL, LOFAP, Kódigu Penál no Rejimentu Parlamentu Nasionál.

PPN haktuir, vise PPN Maria Angelina Lopes Sarmento Obriga Xefe Divizaun Apoia Plenária (DIPLEN), Quintiliano Ase, atu ajenda no prepara materiál ba plenária iha loron 18 Maiu 2020. Aktu ida ne’e viola Rejimentu Parlamentu Nasionál artigu 22 kona-ba kompetensia Vise Prezidente Parlamentu Nasionál nian.

Arão dehan, Vise Prezidente Parlamentu Nasionál só bele ezerse PPN nia funsaun bainhira hetan delegasaun kompeténsia hosi PPN tuir Rejimentu Artigu 22 númeru 3.

Tuir prosedimentu normál iha Parlamentu Nasionál, Prezidente Parlamentu maka iha kompeténsia atu konvoka konferénsia líderes Bankada hodi aprova ajenda ba plenária.

Arão subliña, bainhira Lideres Bankada sira aprova ona ajenda maka Prezidente halo despaixu ba DIPLEN prepara ajenda ba plenária, se laiha reuniaun líder bankada maka plenária mós laiha.

Xefe DIPLEN konsidera katak prosesu ne’ebé Vise-Prezidente Parlamentu Nasionál, Maria Angelina Sarmento, halo ne’e kontra aktu normál funsionamentu Parlamentu Nasionál, nune’e devolve fila fali despaixu refere ba Gabinete Vise Prezidente nian.

Tanba la konsege Obriga DIPLEN, Vise Prezidente Parlamentu Nasionál, Maria Angelina Lopes Sarmento, halo despaixu ba Sekretáriu Jerál atu ajenda plenária ba loron 18 Maiu 2020.

Entretantu, Sekretária Jerál Parlamentu Nasionál, Cedelizia Faria dos Santos, divolve Despaixu hosi Vise Prezidente Parlamentu Nasionál tanba konsidera despaixu refere kontra LOFAP Artigu 7.

LOFAP artigu 7 hateten katak tenke iha delegasaun kompeténsia hosi Prezidente ba Vise Prezidente Parlamentu Nasionál por eskrita antes Vise-Prezidente bele toma funsaun Prezidente Parlamentu nian.

Arão Noé kontinua reafirma Bazeia ba KRDTL artigu 86 (f), Parlamentu Nasionál hein disolusaun hosi Prezidente da Repúblika.

Tuir observasaun Agência TATOLI, resintu Parlamentu Nasionál hetan seguransa másimu hosi Polísia Nasionál Timor-Leste (PNTL).

Notísia Relevante: Bankada FRETILIN, PLP no KHUNTO “Obriga” Vise-Prezidente Na’in-Rua Ajenda Pedidu Destituisaun

Jornalista  : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here