Bankada Partido FRETLIN, PLP, KHUNTO. Imajen/Egas Cristovão

DILI, 15 maiu 2020 (TATOLI)—Bankada Parlamentár tolu (3) kompostu hosi FRETILIN, PLP no KHUNTO husu ona Vise-Prezidente na’in-rua “obrigatoriamente” ajenda pedidu destituisaun hodi destitui Prezidente Parlamentu Nasionál, Arão Noé de Jesus da Costa Amaral.

Bankada tolu ne’e informa ba públiku katak iha loron-11 fulan-maiu tinan-2020, deputadu sira hatama ona rekerimentu ida ba gabinete Prezidente Parlamentu Nasionál hodi fo hanoin kona-ba termu artigu 16-B numeru 2 RPN nian ne’ebé regula “Pedido de destituição, cuja votação e obrigatoriamente agendada para uma sessão plenária a ter lugar no prazo nao superior a cinco dias.”

Ne’e hateten Katak, rekerimentu ba destituisaun PPN obrigatoriamente tenke hetan votasaun iha prazu másimu loron lima (5) de’it, prazu ne’ebe sei sura hosi loron servisu PN nian (dias úteis do PN) ka la sura ho loron sábadu no domingu, sei hotu iha tersa loron-12 fulan-maiu tinan-2020.

Iha loron-13 fulan-maiu tinan-2020, deputadu sira na’in-33 asina tán karta ida hodi husu ba Prezidente Parlamentu Nasionál atu hala’o sesaun plenária ida imediatamente tanba prazu loron 5 ne’ebé Rejimentu Parlamentu estipula liutiha ona.

Iha sira-nia karta ba PPN sublinha lia fuan “obrigatoriamente” tuir artigu rejimentu, katak gosta ka la gosta, hakarak ka lakohi, iha ka laiha razaun, PPN tenke uza nia kompetensia tuir artigu 17 RPN, tenke konvoka sesaun plenária ida atu halo votasaun ba pedidu destituisaun ida-ne’e.

Maske PPN atuál rejeita ho argumentu sira ne’ebé sita iha karta laran, tuir Rejimentu Parlamentu Nasional, deklarasaun ida-ne’e laiha fatin atu la ajenda plenaria ba votasaun destituisaun.
Maluk sira,

Vise Xefe Bankada Parlamentár PLP, Francisco de Vasconcelos. Imajen/ Egas Cristovao.

“Deputadu mairoia absolusra na’in-33 husu ona ba Vise-Prezidente Parlamentu Nasionál “obrigatoriamente” ajenda votasaun destituisaun ba Prezidente Parlamentu Nasionál tanba iha impedimentu. Iha situasaun hanesan ne’e, únika dalan mak Vise-Presidente sira substitui PPN hodi asumi prezidénsia atu konvoka no dirije sesaun plenária, nu’udar haklaken iha RPN artigu 22 númeru 1,” dehan Vise-Xefe Bankada Partidu Libertasaun Populár (PLP), Francisco de Vasconcelos, liuhosi Konferénsia Imprensa, ne’ebé akompaña hosi Vise-Xefe Bankada Frente Revolusionária Timor-Leste Inedpendente (FRETILIN), Francisco Miranda Branco no Deputada bankada Kmanek Haburas Unidade Nasionál Timor Oan (KHUNTO), Olinda Guterres, iha sala bankada FRETILIN, sesta ne’e.

Bankada tolu ne’e husu ona Vise-Prezidente Parlamentu Nasionál, Deputadu Maria Angelina Sarmento Lopez no Segundu Vise-Prezidente Parlamentu Nasionál, Deputadu Luis Roberto lidera meza, segunda-feira, semana oin.

Bankada tolu ne’e esplika, vise-prezidente sira só presiza delegasaun kompeténsia husi PPN, bainhira atu desempeña funsaun reprezentasaun ruma, hanesan espresamente haklaken iha artigu 22 númeru 3, RPN.

“Ho baze interpretasaun ba RPN hanesan deskreve iha ne’e duni, mak ami deputadu na’in-33 asina ona karta ida iha loron-13 fulan-maiu ne’ebé diriji ba vise-prezidente Parlamentu Nasionál nain-rua, Maria Angelina Sarmento no Luis Roberto hodi husu sira atu substitui Prezidente Parlamentu Nasionál temporariamente hodi konvoka no lidera sesaun plenária ba votasaun destituisaun prezidente parlamentu atuál,” dehan Deputadu PLP ne’e.

Nune’e, deputadu sira ho maioria parlamentár ne’e husu no hein vise-prezidente parlamentu sira asumi funsaun ida-ne’e iha tempu badak ne’e nia laran, atu kumpre artigu 16-B RPN hodi ajenda obrigatoriamente votasaun ba destituisaun Prezidente Parlamentu ne’ebé hato’o tiha ona iha loron-5 fulan-maiu liubá.

Deputadu Francisco de Vasconcelos afirma, tuir lei Estadu Emerjénsia ne’ebé vigora hela katak orgaun soberania sira Estadu nian tenke mantein funsionamentu no tanba ne’e duni deputadu maioria iha parlamentu nasionál hakarak atu vise-prezidente sira ajenda lalais votasaun ida-ne’e atu garante funsionamentu normál.

Bankada Parlamentár tolu ne’e reafirma, pozisaun ne’e foti tanba Prezidente Parlamentu Nasionál, Arão Noé de Jesus da Costa Amaral, la konsidera pedidu destituisaun.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here