Deputadu Bankada CNRT, José Virgilio, kaer metin hela kadeira Prezidente Parlamentu Nasionál nian hodi la fó fatin ba Deputada Maria Angelina atu tuur iha kadeira númeru 01 iha PN ne’e. Imajen Tatoli/Egas Cristovão.

DILI, 18 maiu 2020 (TATOLI)—Deputadu sira hosi Bankada Congresso Nacional da Reconstrução de Timor (CNRT) la fó fatin ba Vise-Prezidente Parlamentu Nasionál, Deputada Maria Angelina Sarmento, atu tuur iha kadeira Prezidente Parlamentu Nasionál.

Tuir observasaun Agência TATOLI, deputadu sira tama iha sala plenária iha tuku 10.00 daeersan. Vise-Prezidente Maria Angelina Sarmento Lopes no Segundu Vise-Prezidente Deputadu Luis Roberto hahú tuur ona sira-nia kadeira ne’ebé bainbain sira na’in-rua lidera meza.

Bankada Parlamentár FRETILIN, PLP no KHUNTO hatama ona pedidu rekerimentu ba Prezidente Parlamentu Nasionál, Arão Noé de Jesus da Costa Amaral, iha loron-11 fulan-maiu tinan-2020.

Bankada tolu ne’e hatama tán karta ida hodi insiste ba Prezidente Parlamentu Nasionál tenke ajenda votasaun ba peididu destituisaun ne’e maibé Arão Noé rezeita pedidu ne’e hotu no mantein hein Prezidente Repúblika, Francisco Guterres ‘Lú Olo’ halo disolusaun ba Parlamentu Nasionál.

Ho pedidu ne’ebé rejeita hosi PPN entaun Bankada Parlamentár kompostu hosi FRETILIN, PLP no KHUNTO hatama pedidu destituisaun hatama pedidu ida ba Vise-Prezidente Maria Angelina Sarmento Lopes no Luis Roberto, iha loron-13 fulan-maiu tinan-2020 atu lidera meza iha segunda-feira, ohin.

Tuir observasaun ne’ebe Agência TATOLI halo iha Parlamentu Nasionál, bankada tolu fó kompeténia ba Vise-Prezidente Maria Angelina Sarmento Lopes, atu lidera meza maibé Deputadu Bankada CNRT, José Virgilio, kaer metin hela kadeira Prezidente Parlamentu Nasionál nian hodi la fó fatin ba vise na’in-rua atu tuur iha kadeira númeru 01 iha PN ne’e.

Imajen Espesiál.

“Kadeira ne’e ami bele fó maibé tenke tuir lei no labele mai hadau de’it,” Deputadu CNRT, José Virgílio, ko’alia bainhira deputadu sira hosi Bankada FRETILIN, PLP no KHUNTO tenta “obriga” Deputada Maria Angelina, tuur iha Arão Noé nia fatin, segunda ne’e.

Purtantu situál oras ne’e iha Parlamentu Nasionál, Deputadu sira hosi Bankada FRETILIN, PLP no KHUNTO tuur metin iha sala plenária maibé hosi parte CNRT hamriik de’it iha resintu plenária nian.

Nune’e mós, oras ne’e daudaun mosu funu malu ho liafuan hosi ibun ho ibun entaun reprezentante povu sira iha PN seidauk iha serteza ajenda ba plenária.

Entretantu, to’o oras ne’e Deputadu CNRT, José Virgilio, sei kaer metin hela kadeira Prezidente PN, Arão Noé de Jesus da Costa Amaral nian.

Notísia Relevante: PPN Konsidera Deputada Maria Angelina Viola Konstituisaun, LOFAP, Kódigu Penál no RPN

Jornalista : Evaristo Soares Martins

Editór     : Cancio Ximenes

HAKEREK NO HATÁN

Please enter your comment!
Please enter your name here