Bankada Partido FRETLIN, PLP, KHUNTO. Imajen/Egas Cristovão

DILI, 18 maiu 2020 (TATOLI)—Bankada Parlamentár tolu (3) kompostu hosi Frente Revolusionária Timor-Leste Independente (FRETILIN), Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO), keixa deputadu CNRT balun ba Ministériu Públiku (MP) kona-ba invade meza parlamentu.

Tuir komunikadu imprensa konjunta hosi Bankada FRETILIN, PLP, no KHUNTO, ne’ebé Agência TATOLI asesu, segunda (18 maiu 2020) ohin, haktuir interferénsia ida-ne’e konstitui krime koasaun kontra orgaun konstitusionál no perturbasaun ba funsionamentu órgaun konstitusionál.

“Interferénsia ida-ne’e konstitui krime koasaun kontra orgaun konstitusionál no perturbasaun ba funsionamentu órgaun konstitusionál, ne’ebé tuir Kódigu Penál punidu hanesan estipula iha artigu 204 no 205,”  komunikadu imprensa ne’e haktuir.

Tuir komunikadu imprensa ne’e hateten, ohin (18 maiu 2020), deputadu na’in lima hamutuk ho vise-Prezidente Parlamentu Nasionál na’in-rua, asina karta ida hodi hato’o keixa ba Ministeriu Públiku hasoru deputadu CNRT sira, Maria Fernanda Lay, Virginia Ana Belo, Bendita Moniz Magno, Maria Gorumali Barreto, Maria Rosa da Câmara Bisoi, José Virgílio Rodrigues Ferreira, Maria Terezinha da Silva Viegas no Ricardo Baptista, ne’ebé halo aktu fíziku hodi perturba no impede parlamentu nasional hala’o sesaun plenária.

“Tanba aktu krime ne’ebé deputadu sira-ne’e komete, deputadu rekerente sira hato’o ona keixa hasoru sira ba Prokuradór Jerál Repúblika no hato’o katak ida-ne’e áktu interferénsia Órgaun Soberania Estadu, Parlamentu Nasional, nia funsionamentu, hatudu momoos blokeia funsionamentu, parlamentu labele hala’o plenária,” komunikadu imprensa ne’e hateten.

Entretantu, Vise-Prezidente Parlamentu Nasionál, Deputada Maria Angelina Sarmento, deklara katak asaun sira-ne’ebé invade meza parlamentu signifika deputadu sira-ne’e komete krime ida ne’ebé impede funsionamentu normál vise-prezidente sira-nian atu preside plenária.

Notísia Relevante: Vise PN Husu PPN Justifika Razaun Liuhosi Plenária

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here