Prezidente Parlamentu Nasionál, Arão Noe de Jesus da Costa Amaral. Imajen /Egas Cristóvão

DILI, 18 maiu 2020 (TATOLI)—Prezidente Parlamentu Nasionál, Arão Noé de Jesus da Costa Amaral hateten, ohin, laiha ajenda ba plenária tanba semana kotuk laiha reuniaun líder bankada.

“Ha’u-nia pozisaun mak ne’e, ohin, laiha ajenda ba plenária. Se iha ajenda ruma ho tentativa ne’ebé halo ne’e fora hosi responsabilidade ha’u-nian,” dehan Arão Noé de Jesus da Costa Amaral ba jornalista sira liuhosi Konferénsia Imprensa, iha Parlamentu Nasionál, segunda ne’e.

Nia esplika, Konstituisaun RDTL artigu 99 alínea 3, Parlamentu Nasionál reuni ordinariamente tuir konvokasaun Prezidente Parlamentu nian.

Tuir nia, Vise-Prezidente Parlamentu Nasionál sira lidera meza bainhira hetan delegasaun kompeténsia hosi Prezidente Parlamentu Nasionál.

Prezidente Parlamentu Nasionál ne’e subliña, tuir rejimentu Parlamentu Nasionál nian atu ajenda ruma tenke hetan aprovasaun liuhosi konvokatóriu líder bankada. Bainhira ajenda ruma ajenda hetan aprovasaun hafoin lori ba plenária hodi diskute no halo aprovasaun.

“Ha’u hatete katak, ohin, laiha ajenda ruma ba plenária. Sé tentativa sira mosu ne’e la’ós ha’u-nia responsabilidade,” nia hateten.

Nia esplika, Vise-Prezidente Parlamentu Nasional só bele ezerse PPN nia funsaun bainhira hetan delegasaun kompeténsia hosi PPN tuir Rejimentu artigu 22 númeru 3

“Tuir prosedimentu normál iha Parlamentu Nasionál, Prezidente Parlamentu maka iha kompeténsia atu konvoka Konferénsia Lideres Bankada hodi aprova ajenda ba plenária. Bainhira lideres bankada sira aprova ona ajenda maka Prezidente halo despaixu ba DIPLEN prepara ajenda ba plenária, se laiha reuniaun líder bankada maka plenária mós laiha,” Prezidente Parlamentu Nasionál ne’e esplika.

Masko PPN deklara laiha plenária, maibé situasaun iha plenária laran diferensa ho plenária bainbain tanba bankada FRETILIN, PLP no KHUNTO fó ona kompeténsia ba Vise-Prezidente Parlamentu Nasionál, Maria Angelina Sarmento Lopes atu lidera meza maibé hosi parte CNRT nian la fó fatin.

Notísia Relevante: CNRT La Fó Fatin Ba Deputada Maria Angelina Tuur iha Arão Noé Nia Fatin

Jornalista : Evaristo Soares Martins

Editór     : Cancio Ximenes

HAKEREK NO HATÁN

Please enter your comment!
Please enter your name here