Imajen Tatoli/Cipriano Colo.

OE-CUSSE, 15 maiu 2020 (TATOLI)–Sosiedade Sivíl Rejiaun Administrativa Espesiál Oe-Cusse Ambenu (RAEOA) deskontente (lahaksolok) ho Prezidente Autoridade José Luis Guterres ne’ebé dezde simu pose iha fulan Novembru 2019 maibé nunka mosu hodi ‘abandona’ rai enklave Oe-Cusse.

Liuhosi Konferénsia Imprensa iha edifísiu Organizasaun Naun Governamentál (ONG), Fundasaun Fatu Sinai Oecuse (FFSO), Santa Rosa, Koordenadór Organizasaun Naun Governamentál (ONG), REINO, Martinho Neno, fó sai sentimentu deskontente ne’e iha pontu hitu (7).

Primeiru,  sosiedade sivíl no komunidade Atoni-Ambenu, hakarak atu Prezidente Autoridade José Luis Guterres dezde simu pose iha fulan Novembru 2019, to’o oras ne’e sei mosu iha Oe-Cusse no kontinua hela permanente iha Dili, no iha semana nia rohan (fim de semana) mak mai iha Oe-Cusse no vizita liu de’it, hafoin ne’e fila fali ba Dili.

Segundu, bazeia ba lei númeru 3/2014 Prezidente Autoridade iha kompeténsia atu propoin ba Konsellu Ministru hodi hetan aprovasaun ba Sekretáriu Rejionál sira maibé to’o oras ne’e seidauk realiza no realidade rekruta fali asesor hodi halo servisu.

Terseiru, Prezidente autoridade la kumpre promesa kona-ba atu promove Oe-Cusse-oan sira hodi assume kargu iha gabinete RAEOA maibé realidade lori fali ema husi Dili no munisípiu seluk mak halo servisu iha Oe-Cusse.

Kuartu, tuir sosiedade sivíl nia observasaun katak durante fulan hitu, simu ona mandatu nu’udár Prezidente Autoridade maibé José Luis Guterres uza de’it eskritóriu hodi asina dokumentu.

Kintu, komunidade afetadu hein hela Prezidente Autoridade ho sekretáriu rejionál sira atu rezolve  problema ne’ebé autoridade anteriór husik hela.

Sestu, durante fulan hitu hala’o mandatu, Prezidente Autoridade seidauk konvoka enkontru ho diretór no xefia sira iha RAEOA.

Setimu, tuir observasaun sosiedade sivil iha Oe-Cusse haree katak mudansa klimátika mundiál, fó impaktu makaas ba vida povu nian tanba la konsege kolleta, liuliu iha tinan ne’e, nune’e oras ne’e povu enfrenta hela hamlaha.

“Ho pontus hirak ne’ebé mak ami mensiona iha leten, ami konklui katak Prezidente Autoridade Luis Guterres, ladún toma atensaun atu administra no lidera RAEOA-ZEESM TL. Ami sosiedade sivíl no povu Atoni, husu prezidente Autoridade atu propoin ona naran ka lista sekretáriu rejionál sira ba Primeiru Ministru ho lalais. Terseiru, ami povu Atoni-Oe-Cusse ezije atu Prezidente Autoridade fó prioridade ba Oe-Cusse oan, hodi assume kargu estrutura rejionál. Kuartu, karik laiha resposta pozitivu ba ami-nia ezijénsia, ami povu Atoni sei mobiliza masa hodi halo manifestasaun kontra Prezidente Autoridade,” Martinho hateten.

Antes ne’e, Prezidente Autoridade RAEOA José Luis Guterres hateten se fó prioridade ba Oe-Cusse-oan sira hodi assume kargu sekretáriu rejionál sira.

Entertantu, Sosiedade sivil sira ne’ebé espressa sira-nia sentimentu la haksolok ne’e kompostu hosi Organizasaun Naun Governamentál lokál sira mak hanesan, Rede Informasaun Oecuse (REINO), Fundasaun Fatu Sinai Oecuse (FFSO), Youth Action to Work Sustainability (Y-ACTS), Centro Educação Sívica Enclave Oecuse (CECEO), Asosiasaun Haburas Kapasidade Agrikultura no Ekonomia (AHCAE), no Fundasaun Komunidade Beun Sila (FUNIBES).

Jonalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here