Prezidente Parlamentu Nasionál, Arão Noe de Jesus da Costa Amaral. Imajen Tatoli/Egas Cristóvão

DILI, 14 maiu 2020 (TATOLI)—Prezidente Parlamentu Nasionál, Arão Noé de Jesus da Costa Amaral, hateten laiha dalan ba destituisaun maibé hein de’it Prezidente Repúblika, Francisco Guterres ‘Lú Olo’ disolve Parlamentu Nasionál tanba parlamentu hasoru ona krize institusionál.

Prezidente Parlamentu Nasionál, Arão Noé de Jesus da Costa Amaral reafirma fali ninia pozisaun hanesan deklara ona ba publiku iha loron 11 maiu 2020 relasiona ho situasaun polítika atuál iha rai-laran.

Nia esplika, Konstituisaun RDTL Artigu 86 (f) kona-ba kompeténsia Prezidente Republika nian deskreve katak hakotu ka dizolve Parlamentu Nasionál, iha kazu krize boot institusionál nian-ne’ebe labele iha formasaun governu ka aprovasaun orsamentu jerál estadu nian, iha tempu naruk liu loron 60, bainhira rona tiha ona partidu polítiku sira ne’ebé hetan kadeira iha parlamentu nasionál no rona Konsellu Estadu.

Bazeia ba Konstituisaun Repúblika Demokrátika Timor-Leste artigu 86 (f) iha loron 10 fevereiru 2020, Prezidente Republika konvoka reuniaun meja redonda hodi hamosu opsaun tolu (3), inklui opsaun ida ba partidu polítiku sira hodi halo movimentu polítika atu forma governu foun.

Arão dehan, prazu loron 60 tuir KRDTL Artigu 86 (f) sura hosi loron 17 janeiru 2020 to’o 17 marsu 2020. Situasaun atuál hatudu katak iha ona loron 14 maiu 2020 laiha partidu ka koligasaun ne’ebe forma Governu Foun ka aprova Orsamentu Jeral Estadu tuir rekizitu Konstitusaun RDTL artigu 86 (f).

Arão Noé afirma, ne’e hatudu katak ultra-pasa tiha ona prazu loron neen-nulu (60) ne’ebe temi iha Konstituisaun RDTL artigu 86 (f).

“Tanba ne’e Parlamentu Nasionál V Lejizlatura hein de’it dizolusaun hosi Sua Exelénsia Prezidente Repúblika tuir Konstituisaun haruka. Bazeia ba pontu sira ne’ebé temi iha leten maka, há’u, Prezidente Parlamentu Nasional Konsidera katak laiha Ona Dalan ba Deputadu sira atu rekere destituisaun ba Prezidente Parlamentu Nasional ao mezmu tempu laiha ona fatin ba plenária,” Arão Noé informa liuhosi Konferénsia Imprensa, iha Parlamentu Nasionál, kinta ne’e.

Prezidente Parlamentu Nasionál argumenta, karta rekerimentu distituisaun ba Prezidente Parlamentu Nasional ne’ebé emvez de dirije ba Prezidente Parlamentu Nasional maibé rekerente sira dirije fali ba Vise -Prezidente Parlamentu Nasional.

“Ida ne’e Kontra Rejimentu Parlamentu Nasional artigu 17, nune’e konsidera ilegál no la tuir regra administartivu Parlamentu Nasionál nian. Tanba durante ne’e Prezidente Parlamentu Nasional kontinua hala’o nia funsaun no nunka falta ka iha impedimentu, nune’e rekerente nia akuzasaun katak PPN falta no iha impedimentu ne’e laloos, ilegal no la justifikavel. Ha’u, Prezidente Parlamentu Nasionál kompremetidu atu kumpre KRDTL Artigu 2 (2) katak Estadu Hakruuk ba Lei Inan no Lei Oan sira. Tanba ne’e ha’u husu ba orgaun estadu, atu ita hotu-hotu hakruuk deit ba Lei Inan ka Konstituisaun,” hateten Prezidente Parlamentu Nasionál, Arão Noé.

Notísia Relevante: Vise-Prezidente Nai’n-Rua Prontu Prezide Meza PN

Jornalista : Evaristo Soares Martins

Editór      : Cancio Ximenes

1 KOMENTÁRIU

  1. klaru tebes Nai PPN, ita mak sai exemplar ba lider orgaun sira seluk hanean PR, no PM, tanba sira ema matenek maibe sira haluhan an, sira sira ema veteranos 24 anos hamutuk ho povo maibe sira haluhan KRDTL no haluhan sira nia povo. espera katak ita sai lider nebe diak ba sira seluk atu banati tuir.

HAKEREK NO HATÁN

Please enter your comment!
Please enter your name here