Vise-Prezidente Parlamentu Nasionál, Maria Angelina Sarmento. Foto Egas Cristóvão

DILI, 12 maiu 2020 (TATOLI)—Vise-Prezidente Parlamentu Nasionál na’in-rua kompostu hosi Deputada Maria Angelina Sarmento Lopez no Deputadu Luis Roberto prontu prezide meza Parlamentu Nasionál.

Vise-Prezidente Parlamentu Nasionál, Deputada Maria Angelina Sarmento Lopez hosi bankada Partidu Libertasaun Populár (PLP) no Segundu Vise-Prezidente Parlamentu Nasionál, Luis Roberto hosi bankada Kmanek Haburas Unidade Nasionál Timor Oan (KHUNTO).

Vise-Prezidente Parlamentu Nasionál, Deputada Maria Angelina Sarmento Lopez, hateten deputadu na’in-33 lakon konfiansa ba Prezidente Parlamentu Nasionál, Arão Noé de Jesus da Costa Amaral.

Nia dehan, loloos prezidente parlamentu simu responsabilidade, politikamente no moralmente hodi tau ajenda ba pedidu destituisaun ne’e.

Tuir nia, prezidente parlamentu ne’e povu la hili diretamente maibé hili liuhosi deputadu sira iha parlamentu entaun deputadu sira lakon fiar ona, la depozita ona konfiansa ba nia no hakarak retira konfiansa ida-ne’e hosi prezidente parlamentu atuál.

Deputada PLP ne’e argumenta ho Rejimentu Parlamentu Nasionál (RPN) artigu 14 númeru 4 fó dalan, bainhira prezidente falta ka hetan impedimentu, sei substitui, rotativamente hosi vise-prezidente ida.

Nune’e mós RPN artigu 22 númeru 1 (Kompeténsia Vise-Prezidente) hateten, rotativamente, substitui prezidente bainhira nia falta ka iha impedimentu ruma ou Deputadu tinan boot liu hotu mak kaer prezidénsia.

“Entaun prezidente parlamentu falta ka iha impedimentu ruma bele substitui hosi vise-prezidente na’in-rua rotativamente no karik vise na’in-rua ne’e maka laiha hotu entaun deputadu ida-ne’ebé mak katuas liu bele asume fali responsabilidade hodi lidera plenária. Vise na’in-rua bele hala’o fali kna’ar prezidente nian hodi lidera plenária. Vise-prezidente sira asume tanba órgaun ne’e koletivu la’ós unipesoál,”  Deputada Maria Angelina Sarmento Lopez, informa ba jornalista sira, iha Parlamentu Nasionál, tersa ne’e.

Ohin ne’e, nia dehan, últimu dia (pedidu destituisaun) maibé se prezidente parlamentu atuál la ajenda, tenke hatene katak parlamentu ne’e órgaun koletivu kolejiál, só Prezidente-Repúblika mak ema-ida labele substitui tanba nia unipesoál maibé  parlamentu ne’e órgaun koletivu.

Luis Roberto, Deputadu Bankada KHUNTO

Nia esplika, bainhira halo eleisaun ba prezidente parlamentu, tuir kedas halo eleisaun ba vise-prezidente sira tanba ne’e rejimentu fó dalan vise-na’in rua prezide plenária.

Entretantu, Segundu Vise-Prezidente Parlamentu Nasionál, Luis Roberto, prontu lidera plenária bainhira prezidente parlamentu nasionál la prezide.

“Ha’u pronto. Sobu nasaun mak ha’u ta’uk maibé prezide meza parlamentu hodi funsionamentu órgaun soberania ne’e la’o nafatin ha’u la ta’uk ida,” dehan Deputadu hosi Bankada KHUNTO ne’e.

Hatán ba kestaun ne’e, Vise-Xefe Bankada Congresso Nacional da Reconstrução de Timor (CNRT), Deputadu Patrocínio dos Reis Fernandes, fiar vise-na’in rua la halo buat ne’ebé mak sei kontra lei tanba rejimentu no nein konstituisaun mós la fó dalan.

“Iha rejimentu ne’e deskre klaru katak vise na’in-rua bele halo servisu bainhira prezidente parlamentu mak delega kompeténsia. Ha’u fiar sira na’in-rua la monu ba lasu polítika ida ne’e, satán vise na’in-rua sei joven, sira-nia karreira polítika sei naruk. Se situasaun ne’e akontese entaun ne’e asalta podér tanba ne’e husik depois ita haree,” Deputadu CNRT ne’e hateten.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here