DILI, 13 maiu 2020 (TATOLI)- Portavós Sala Situasaun Sentru Integradu Jestaun Krize (SS-CIGC-sigla Portugés) nu’udar mós Koordenadór Ligasaun Ofisiál Ba Forsa Tarefa COVID-19, Rui Maria de Araújo, apresia ho serbisu Polísia Nasionál Timor-Leste (PNTL) Munisípiu Dili ne’ebé hahú bandu ona Timoroan sira halo ezersísiu ho grupu boot iha tempu dadersán no lokraik.
Notísia Relevante : Pasiente COVID-19 Baixa Iha Vera Cruz Hela Na’in-Lima
Rui Araújo hateten, asaun ne’ebé PNTL bandu abitante sira halo ezersísiu ho grupu boot nu’udar parte ida atu evita abitante sira bele kuidadu-an hodi livre husi ameasa surtu Coronavirus ka COVID-19 ne’ebé daudaun ne’e da’et iha mundu tomak, inklui Timor-Leste.
Eis Ministru Saúde ne’e alerta ba povu tomak iha territóriu nasionál katak Timor-Leste sei kontinua iha faze alerta trés (3) ka faze metigasaun hodi husu povu mantein nafatin distánsia sosiál no fíziku hodi hela iha uma.
“Ita serbisu hamutuk ho PNTL hahú impoin regra ona, hahú tersa (12/05/2020) too mai ohin dadeer, joven sira kontinua sai barak iha grupu no la’o mesak PNTL intervein ona hodi prevene movimentasaun barak,” hateten Rui Araújo ba jornalista liuhusi konferénsia imprensa iha Sentru Mídia CIGC iha Sentru Konvensaun Dili (CCD), kuarta (13/05/2020).
Nia afirma katak, ema hanoin moras COVID-19 la’o dook ona husi Timor-Leste, maibé kuidadu nafatin hodi atensaun no dixiplina nafatin, tanba Ministériu Saúde sei buka nafatin amostra hodi buka evidénsia kona-ba transmisaun iha komunidade.
Nia hatuan, mezmu too agora ekipa Ministériu Saúde seidauk hetan evidénsia transmisaun moras COVID-19 iha komunidade no iha munisipiu, maibé husu atu abitante sira mantein kalma iha uma no evita ransu ka halibur malu ho grupu boot.
“Ita hatene katak, risku ida boot tebes-tebes maka ema sira ne’ebé iha moras iha sira nia isin, maibé la hatudu sintoma, tanba ne’e husu ba povu kontinua koopera hodi kumpre distansiamentu sosiál, distansiamentu fízika, sai karik uza máskara, hela hakmatek iha uma no kontinua pratika fase-liman ho sabaun,” hateten Rui Araújo.
Nia husu mós ba PNTL atu atua sitasaun ho dixiplina hodi evita forsa para abitante sira ho voluntáriu koopera no husu atu PNTL kontinua intervein hodi regula ema sira ne’ebé ba foti osan iha banku forma la bele ho grupu no kumpre distánsia fíziku para ema ida-idak bele prevene-an.
Jornalista : Eugénio Pereira
Editór : Francisco Simões
