Update dadus COVID-19, dia 13 marsu 2020. Dok. official CIGC

DILI, 13 maiu 2020 (TATOLI) – Esforsu Estadu no Governu Timor-Leste nian hodi luta kontra inimigu invizivél  Coronavirus ka COVID-19 hatudu progresu signifikativu. Tanba ne’e, pasiente pozitivu ne’ebé baixa iha Sentru Izolamentu Vera Cruz, Dili, hela na’in-lima (5) de’it (menus na’in-ida) kompara ho horiseik na’in-neen (6).

Notísia Relevante : COVID-19: Númeru Teste Sa’e ba 952, Rekuperadu Mantein 22

Liuhusi konferénsia imprensa iha Sentru Mídia, Sentru Integradu Jestaun Krize (CIGC), kuarta (13/05/2020), portavós CIGC, Rui Maria de Araújo, fó sai dadus update situasaun nasionál COVID-19 katak, to’o tuku 12:00 Otl, ohin nian, númeru teste 1.120, hein rezultadu 279, númeru kumulativu kazu konfirmadu kontinua mantein 24 (hanesan mós horiseik), kazu konfirmadu foun la iha (0), kumulativu rezultadu teste laboratóriu negativu 822, númeru baixa lima (5), númeru rekuperadu ona 23 (konfirmadu 19 no provavel haat (4)).

Dadus ofisiál husi Sala Situasaun CIGC ne’ebé aprezenta husi Rui Maria de Araújo, konfirma mós katak, abitante ne’ebé sei iha hela konfinamentu obrigatóriu  ka kuarentena hamutuk 84, ne’ebé na’in-58 iha fasilidade governu nian iha Dili no 26 iha fasilidade governu nian iha munisípiu.

“Abitante ne’ebé kumpre auto-kuarentena iha na’in tolu (3) iha Dili no iha munisípiu la iha (0),” informa Rui Maria de Araújo, nu’udar mós Koordenadór Ligasaun Ofisiál ba Forsa Tarefa COVID-19.

Nia hatutan, abitante sira ne’ebé pasa ona loron-14 iha konfinamentu obrigatóriu iha territóriu nasionál 2.181, kompostu husi iha Dili 1.703 no iha munisípiu 478.

Aproveita mós oportunidade ne’e, Rui Araújo lori SS-CIGC  hato’o ba públiku kona-ba atividade boot-rua ne’ebé Ministériu Saúde (MS) halo; ida) ho naran triazene, signifika MS buka hatene ema sira ne’ebé mai konsulta iha fasilidade sira ne’e no karik sira ne’ebé tama iha sintoma tenke foti amostra husi sira-nia kakorok no  sira-nia inus.

Seluk fali  ka (rua)  MS daudaun halo hela vijilánsia sentinela iha munisípiu 12 inklui Rejiaun Administrativa Oé-cusse Ambeno (RAEOA), tanba ne’e apela ba komunidade atu partisipa ho másima iha atividade ne’e.

“Hakarak mós aproveita oportunidade atu hato’o ba populasaun katak, ita sei nafatin iha parte metigasaun ka alerta trés (3), tanba ne’e populasaun presiza hela nafatin iha uma, se la presiza lalika sai,  ita atensaun no disiplina nafatin,” hateten Rui Araújo.

SS-CIGC apela mós ba populasaun tomak, liuliu ba joven sira atu nafatin lalika sai husi uma no bainhira sai husi uma karik, evita halibur malu ho ema barak, pratika nafatin ijiene pesoál, distánsia sosiál no distánsia fízika.

“Responsabilidade boot liu ba ita sidadaun timoroan mak tenke prevene-an, tanba ne’e, presiza tebes distansiamentu sosial no distansiamentu fíziku,” afirma Rui Maria de Araújo.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here