COVID-19

RAILACO, 13 maiu 2020 (TATOLI)-Xefe Interinu Sentru Saúde Railaco, Postu Administrativu Railaco Vila, Munisípiu Ermera, Rui Manuel Berek, informa oras ne’e implementa ona programa triazen ka vijilánsia sentinela hodi halo konsulta ba pasiente sira para bele deteta transmisaun surtu coronavirus iha komunidade nia le’et.

“Ami mós prepara ona, nune’e pasiente sira mai tama husi fatin ne’ebé no sai hosi ne’ebé hodi koko uluk nia pasiente ida ne’ebé iha moras baibain ka moras ne’ebé presiza halo investigasaun kle’an tanba iha relasaun ho COVID-19,” nia relata ba Jornalista sira iha Sentru Saúde Railaco, kuarta (13/05/2020).

Notísia Relevante :Sentru Saúde Formoza Implementa Programa Vijilánsia Sentinela

Ministériu Saúde maka fó orientasaun hodi implementa programa ne’e iha sentru saúde idak-idak iha territóriu Timor-Leste.

Sentru Saúde ne’e iha ekipamentu no profisionál saúde atu responde ba kazu COVID-19 bainhira deteta.

“Ami iha kuartu ida provizóriu, kuandu pasiente ruma sintoma hatudu COVID-19, nune’e doutór sira sei halo investigasaun kle’an haruka deskansa oras ida-resin atu nune’e ami bele kontaktu ba liña emerjénsia atu mai haree no hasai ran,”tenik tan.

Programa Ministériu Saúde ne’e implementa ona hahú iha segunda (11/05/2020) no sei ramata iha loron 14 fulan-maiu 2020.

Maski implementa ona programa ne’e, maibé tuir Xefe Interinu ne’e seidauk deteta pasiente balun maka ho sintoma COVID-19.

“Ami hetan ona apoiu ekipamentu ba medíku sira hanesan luvas, sapatu, hena sira hatais ne’e kompletu, ami mós iha ona termu scaner, iha mós ekipamentu ba laboratóriu nian atu bele hasai ran karik bele hasai kedan ran pasiente nian,” nia akresenta liután.

“Kona-ba medíku ami sufisiente, tanba hare ba moras ne’e moras ida ne’ebé makas entaun ami husu ajuda hosi medíku sira iha postu saúde hotu iha Railaco laran atu ajuda ne’ebé rekursu ba ami sufisiente,” nia hatutan.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here