Xefe Sentru Saúde Formoza II, Dulce Pinto Tilman

DILI, 11 maiu 2020 (TATOLI)-Sentru Saúde Formoza II Dili, segunda (11/05/2020), hahú implementa desizaun Ministériu Saúde liuhosi Sentru Integradu Jestaun Krize (CIGC-sigla portugés) kona-ba programa vijilánsia sentinela hodi deteta transmisaun lokal surtu COVID-19.

Xefe Sentru Saúde Formoza II, Dulce Pinto Tilman hateten programa ne’e implementa durante loron haat hahú segunda loron 11 sei ramata iha 14 fulan-maiu 2020.

“Tuir despaxu ne’ebé hatun katak pasiente sira ne’ebé mak mai ho sintoma hanesan isin manas, me’ar ,inus metin, entaun pesoál saúde sira tenki hasai sira nia amostra kada sentru saúde tarjetu ema na’in 20,” hatutan Dulce Pinto Tilman ba jornalista sira, iha ninia servisu fatin, segunda ohin.

Tuir relatóriu husi profisionál saúde sira, iha segunda dadeer ne’e foti ona amostra ba pasiente na’in tolu tanba iha sintoma ne’ebé iha ligasaun ho coronavirus.

”Ohin daudaun sira hahú ona atividade vijilánsia sentinela maibé tuir informasaun ne’ebé mak ha’u rona sira hasai ona pasiente na’in tolu nia amostra,” tenik tan.

Nia tenik tan, kada loron iha oras lokraik, ekipa servisu sei lori amostra ne’ebé hasai ona bá iha Laboratóriu Nasionál hodi halo teste para deteta pasiente sira ne’e konfirmadu COVID-19 ka lae.

”Ami sira ne’e hotu hotu servisu iha liña frente depois mak fahe balun ba servisu iha emerjénsia balun servisu ba triazen ba COVID-19, no balun halo vijilánsia promosaun entaun ami sira ne’e mak halo nafatin servisu ida ne’e,”nia realsa liután.

Totál profisionál saúde iha Sentru Saúde Formoza II hamutuk ema na’in 98 konta hosi hamoos rai (clenaner) to’o médiku sira.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here