Provedora Direitu Umanu no Justisa, Jesuína Maria Ferreira Gomes. Imajen/Egas Cristóvão

DILI, 13 maiu 2020 (TATOLI)-Provedora Direitu Umanu no Justisa (PDHJ), Jesuína Maria Ferreira Gomes, husu ba governu atu intensifika ba sosializasaun medida prevensaun COVID-19 tuir regra Ministériu Saúde ho Organizasaun Mundiál Saúde (OMS) ba iha komunidade.

Notísia Relevante : PDHJ Husu PNTL ho F-FDTL Atua Tuir Regra Estadu Emerjénsia

Liuhusi konferénsia imprensa ne’ebé hala’o iha salaun enkontru PDHJ, Caicoli, Dili, kuarta (13/05/2020), Provedora Jesuína Maria Ferreira Gomes, informa, bazeia ba relatóriu monitorizasaun semanál PDHJ nian iha periodu implementasaun estadu emerjénsia ba periodu daruak husi abríl to’o 10  maiu 2020 rejista katak, iha difikuldade kona-ba movimentu maka’as husi populasaun kuaze iha territóriu tomak, kumprimentu ba regra distansiamentu fíziku la halo ho uniforme iha territóriu tomak, no PDHJ haree rasik katak iha fatin balun kumpre ho regra, balun la kumpre, situasaun ida-ne’ebé bele lori impaktu negativu luta kontra propagasaun surtu  COVID-19.

“Husu governu atu intensifika no sosializasaun ba medida preventiva inklui regra estadu emerjénsia nian ba iha komunidade rurál no urbana hodi halo prevensaun ba COVID-19,” Jesuína Gomes hateten.

PDHJ mós hato’o apresiasaun boot ba serbisu ekipa frontline COVID-19 sira hanesan ekipa médiku, autoridade seguransa no parte relevante hotu.

Biban ne’e, Provedora Jesuína Maria Ferreira Gomes husu governu atu aselera  distribuisaun hahán ka subsídiu ba komunidade veneravel no garante nutrisaun ba komunidade vulneravel, tanba situasaun estadu emerjénsia ne’e lori mós  dezafiu boot ida iha aspetu moris sosiál no ekonómiku,  ne’ebé implika mós ba nutrisaun família ida-idak nian.

“Dadus nutrisaun ne’ebé hatudu katak molok Estadu Emerjénsia, besik labarik 50% iha situasaun mal nutrisaun nian no durante semana dahuluk Estadu Emerjénsia seidauk iha distribuisaun ai-han ka apoiu finanseiru ba komunidade husi Governu,” afirma Jesuína Gomes.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here