Provedóra Adjunta Direitu Umanu, Benícia Eriana Magno (klaran), Provedora Jesuina Maris Ferreira Gomes (ninin faru mutin) ho Diretór Fiskalizasaun no Rekomendasaun, Batolomeu Gonçalves (hatais kamizola PDHJ), halo konferensia imprensa iha sala Bibilioteka PDHJ, Caicoli, Dili, sábadu (11/04/2020). Imajen/PDHJ

DILI, 11 abríl 2020 (TATOLI) – Provedór Direitu Umanu
no Justisa (PDHJ) kontinua husu ba Polísia Nasionál Timor-Leste (PNTL) ho FALINTIL-Forsa Defeza Timor-Leste (F-FDTL)  atu atua nafatin  tuir regra estadu emerjénsia ho respeitu ba ema-nia direitu fundamentu no direitu moris.

Notísia Relevante : PDHJ: Estadu Emerjénsia Labele Viola Direitu Moris

Liuhosi komunikadu imprensa, ohin,  PDHJ aprofunda katak, PDHJ nu’udar órgaun independente ida ne’ebé iha funsaun atu apresia no buka atu atende sidadaun sira-nia keixa hasoru podér públiku, bele haree atu ida-idak la’o tuir lei ka la’e, prevene injustisa no hala’o prosesu atu hadi’a injustisa. Tanba ne’e PDHJ iha obrigasaun atu fó hanoin ba podér públiku espesialmente ba forsa armada no  polísia  ne’ebé iha responsabilidade ba fiskalizasaun kumprimentu ba regra-sira, mezmu durante estadu emerjénsia katak atuasaun hotu-hotu tenke haktuir ba legalidade demokrátiku ho respeitu ba direitu umanu.

PDHJ mós husu ba lider instituisaun públika ho seguransa ne’ebé iha responsabilidade boot ba asegura estadu direitu ho respeitu ba direitu, liberdade no garantia fundamental atu evita fó-sai mensajen ba públiku ho ameasa violasaun direitu umanu.

PDHJ fó ezemplu enkoraja agresaun fízika, ne’ebé bele interpreta hosi membru forsa seguransa hanesan instrusaun ka orientasaun superior atu komete ilegalidade no hala’o asaun ne’ebé viola ema-nia direitu fundamental.

Mensajen ne’ebé enkoraja podér públiku (forsa armada, polísia no forsa seguransa-sira) atu uza forsa ho forma la proporsionál tuir kritériu legal viola direitu fundamental ne’ebé garantidu no bele rezulta responsabilidade kriminál.

PDHJ rekoñese gravidade hosi krize saúde kauza hosi surtu Coronavirus ka COVID-19, no rekoñese katak estadu tenke foti medida-sira hodi responde ba kalamidade públika ne’ebé Timor-Leste hasoru agora daudaun. Maibé, medida-sira ba prevensaun tenke nesesáriu no proporsionál.

PDHJ mós fó hanoin katak direitu integridade fizíka la hetan limitasaun durante estadu emerjénsia. Tana ne’e, PDHJ alerta katak, uza forsa hosi forsa seguransa tenke nesesáriu atu foti asaun legal relevante no bele de’it uza forsa nato’on atu hamate risku ba ema seluk nia integridade fízika ka moris.

Ba públiku PDHJ hateten, durante períodu estadu emerjénsia, sidadaun no entidade hotu-hotu tenke kumpre devér kolaborasaun nian, liuhosi kumprimentu ba orden ka instrusaun legal-sira hosi órgaun no ajente-sira ne’ebé sai nu’udar responsavel ba seguransa, protesaun no saúde públika nian.

Ema ka entidade ne’ebé la kumpre orden legal, PDHJ hatutan iha ninia komunikadu nee kata,  sei hetan responsabilidade kriminál ho krime dezobediénsia.

Durante estadu emerjénsia, PDHJ kontinua monitoriza no sei prontu nafatin denunsia abuzu-sira ba direitu umanu, kna’ar ida ne’ebé konsidera importante liu partikularmente iha tempu surtu COVID-19 ne’ebé fó ameasa ba saúde públika no pesoál no halo ema-hotu sai vulneravel.

Jornalista : Nelson de Sousa

Editór        : Francisco Simões  

HAKEREK NO HATÁN

Please enter your comment!
Please enter your name here