Provedora Direitu Umanu no Justisa (PDHJ), Jesuína Maria Ferreira Gomes. Imajen/TATOLI

DILI, 13 maiu 2020 (TATOLI) – Bazeia ba  monitorizasaun Provedoria Direitu Umanu no Justisa (PDHJ) iha ámbitu  estadu emerjénsia (EE) liga ho desizaun Governu nian atu fó subsídiu $100,00 ba kada uma-kain, identifika ka deskobre katak, autoridade lokál husi suku neen (6) komete pratika governasaun la di’ak  tanba halo kobransa ho kuantia orsamentu entre $0,50 to’o $5,00 ba kada família atu hetan fixa família.

Notísia Relevante : PDHJ Husu Intensifika Medida Preventiva COVID-19

Dadus ne’ebé PDHJ rekolla no hatudu prova katak autoridade suku sira (xefe suku ho xefe aldeia)  husi suku neen (6) ne’ebé komete governasaun la di’ak ne’e mak hanesan autoridade Suku Laho-Mea no Karabau, Munisípiu Bobonaro, Suku Cunha iha Rejiaun Administraitvu Espesial Oe-Cusse Ambeno (RAEOA), Suku Daisua, Munisípiu Manufahi no Suku Kamea ho Suku Vila Verde, Munisípiu Dili.

Liuhusi konferénsia imprensa iha salaun PDHJ iha Caicoli, Dili, kuarta (13/05/2020), Provedora PDHJ Jesuína Maria Ferreira Gomes, informa, ho aktu autoridade suku hirak ne’e nian, PDHJ haruka ona karta ba Ministériu Administrasaun Estatál (MAE) atu foti medida lalais.

Nia hatete, to’o agora seidauk iha previzaun, regra ka lei ruma ne’ebé fó kompeténsia atu halo kobransa husi autoridade lokál atu trata fixa família husi komunidade sira.

“PDHJ konsidera aktu autoridade públika sira hala’o de’it laiha lei, Ida-ne’e konsidera ilegalidade no aktu sira-ne’e iha mós responsabilidade kriminál,” afirna  Provedora Jesuína Maria Ferreira Gomes .

Nia hateten, bainhira evidénsia forte husi aktu autoridade lokál sira nian ne’e, maka Ministériu Administrasaun Estatál tenke foti partisipasaun ba iha Komisaun Anti-Korrupsaun (CAC) ka Ministériu Públiku hodi prosesu tuir dalan legál ne’ebé iha.

PDHJ husu ba Ministériu Administrasaun Estatál tenke garante sosializasaun ba regra katak Xefe Suku labele halo kobransa atu rejistu fixa Família nian tanba seidauk prevee iha lejizlasaun atu halo kobransa refere.

Jornalista   : Nelson de Sousa

Editór         : Francisco Simões

 

1 KOMENTÁRIU

  1. PDHJ Karik laos deit Autoriedade suku Lima ka neen ne deit maibe kuaze maioria aplika autoriedade lokal sira aplika aktus hanesa iha prosesu trata Fixa Familia no Hatama dokumentus ba benefisiariu $100.00 sira

HAKEREK NO HATÁN

Please enter your comment!
Please enter your name here