Portavóz CIGC no Koordenadór Forsa Tarefa Prevensaun no Mitigasaun ba Pandemia COVID-19, Sergio Lobo. Imajen Tatoli/Egas Cristovão

DILI, 12 maiu 2020 (TATOLI) – Tuir dadus ne’ebé fó sai husi Sala Situasaun, Sentru Integradu Jestaun Krize (CIGC, sigla portugés) iha tersa ne’e, númeru ema ne’ebé submete ona ba teste COVID-19 iha Laboratóriu Nasionál husi númeru horisehik 922 sa’e ba 952 no númeru rekuperadu mantein 22, ne’ebé kompostu husi kazu konfirmadu na’in-18 no provável na’in-4.

“Númeru abitante ne’ebé submete ona ba teste COVID-19 iha Laboratóriu Nasionál hamutuk ema na’in-952, hein rezultadu 147, komulativu kazu konfirmadu 24, kazu konfirmadu foun 0, negativu 781, númeru ema baixa na’in-neen, no numéru rekuperadu mantein 22”, relata Portavóz CIGC, Sergio Lobo liuhosi Konferénsia Imprensa iha Sentru Mídia COVID-19, iha Sentru Konvensaun Dili (CCD, Sigla Portugés), tersa ne’e.

Koordenadór Forsa Tarefa Prevensaun no Mitigasaun ba Pandemia COVID-19 ne’e adianta, daudaun falta de’it ema hamutuk na’in-91 maka sei kontinua hela iha kuarentena obrigatóriu no auto-kuarentena iha Dili inklui munisípiu durante loron 14 hodi prevene propagasaun surtu COVID-19.

Dadus ohin loron, ema ne’ebé sei iha konfinamentu obrigatóriu hamutuk 88, kompostu na’in-60 iha Dili no na’in-28 iha munisípiu, enkuantu auto-kuarentena hamutuk na’in-tolu iha Dili no iha munisípiu seluk laiha.

Sidadaun sira ne’ebé maka pasa ona kuarentena obrigatóriu no auto-kuarentena durante loron 14 hamutuk ema na’in-2.177, kompostu husi Dili ema na’in-1.701 no munisípiu na’in-476.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here