Membru PN Na’in-18 Husu Fiskalizasaun TR ba Aktu PR Lú Olo
DILI, 05 maiu 2020 (TATOLI) – Membru Parlamentu Nasional (PN) na’in-18, liuhosi sira-nia advogadu Manuel Tilman ho Miguel Acácio Faria, tersa (05/05/2020), purvolta tuku 09:30 Otl, hatama ona “petisaun” ba Tribunál Rekursu (TR) hodi ezije TR halo fiskalizasaun ba konstitusionalidade aktu Prezidente Repúblika (PR), Francisco Guterres “Lú Olo” nian.
Notísia Relevante : AMP Ne’ebé Lidera Hosi CNRT Sei Hatama Petisaun Ba TR
Karta petisaun ne’e entrega direita hosi Advogadu Manuel Tilman ho Miguel Acácio Faria, ne’ebé akompaña mós hosi Adjuntu Sekretáriu Jerál Partidu CNRT, Jacinto Rigoberto, inklui kuadru Aliansa Maioria Parlamentár (AMP) foun balun.
Prezensa ekipa advogadu ne’ebé hatama petisaun ne’e, simu diretamente hosi Prezidente Tribunál Rekursu, Deolindo dos Santos, no ekipa advogadu mós ba halo kedas rejistu iha parte sekretariadu TR nian.
Membru PN na’in-18 ne’ebé asina petisaun ne’e mai hosi bankada CNRT, Bankada PD, Bankada UDT, Frente-Mudansa (FM) ho mós PUDD.
Hafoin entrega karta petisaun ne’e, Advogadu Manuel Tilman, informa ba jornalista sira katak, konteúdu hosi karta petisaun ne’e atu husu apresiasaun ba Tribunál Rekursu hodi halo fiskalizasaun hodi apresia aktu Prezidente Repúblika nian.
“Ami nia prezensa iha Tribunál Rekursu tuir saida mak konstituisaun hateten, kumpre konstituisaun, tanba ne’e, Tribunál Rekursu mak sei anunsia,” informa Manuel Tilman.
Manuel Tilman fó razaun katak, membru PN na’in-18 ne’ebé halo “a baixu asinadu” karta petisaun ne’e entende katak, iha aktu barak mak Prezidente Repúblika foti liga ho situasaun polítika rai-laran seidauk responde ba konstituisaun, hanesan iha artigu 86 alínea F hateten, katak kuandu la aprova orsamentu jerál estadu (OJE) liu loron 60 tenke disolve Parlamentu Nasionál, maibé ida-ne’e Prezidente Repúblika la kumpre.
Seluk fali, Manuel Tilman esplika, tuir artigu 106 Konstituisaun katak indijitasaun ba Primeiru-Ministru tuir eleisaun se mak manan nia mak indijita.
Nia esplika, iha indijitasaun Primeiru-Ministru oitavu governu iha koligasaun AMP ne’ebé manan eleisaun mak Taur Matan Ruak, ne’e duni tuir Konstituisaun, nia laiha ona maioria Parlamentu Nasionál no Taur Matan Ruak rasik husu demisaun, maibé to’o ohin loron, laiha resposta hosi Prezidente Repúblika katak simu ka la simu.
“Sua Exelénsia Primeiru-Ministru dada-fali karta demisaun ne’e, responsabilidade nai PR ho PM nian, maibé ami mai iha ne’e so ba de’it responsabilidade Prezidente Repúblika nian,” hateten Manuel Tilman.
Manuel Tilman esplika, seluk mak liu-liu orsamentu jerál estadu, ohin loron, povu halerik, devia parlamentu desolvidu tiha ona tanba orsamentu laiha.
“Devia orsamentu laiha parlamentu ne’e desolvidu ona, se Prezidente Repúblika iha kulpa ruma karik, iha ne’e de’it, tanba liu loron 60 la konsege aprova orsamentu jerál estadu halo disolvidu hodi hetan fali governu foun, hodi aprezenta fali orsamentu foun para rezolve povu ida ne’e nia problema,” Manuel Tilman esplika.
Tuir lei, karta petisaun ne’e hatama iha prazu ba loron 30 sura hosi hatama karta petisaun hodi Tribunál Rekursu halo analiza no fó apresiasaun.
Jornalista : Nelson de Sousa
Editór : Francisco Simões
