Ministru Obra Públika, Salvador Soares dos Reis Pires, Imajen/Florencio.

DILI, 12 maiu 2020 (TATOLI) – Primeiru-Ministru, Taur Matan Ruak, tersa (12/05/2020), iha Palacio do Governo, hala’o enkontru ho Ministru Obra Publika (MOP), Salvador Soares dos Reis Pires, hodi  fó orientasaun ba MOP koopera ho Sala Situasaun Sentru Integradu Jestaun Krize (SS-CIGC-sigla Portugés) hodi reabilita provizóriu Ospitál Antigu Dr. António Carvalho, Lahane-Dili, hodi utiliza ba sentru tratamentu pasiente COVID-19.

Notísia Relevante : Ospitál Lahane Iha Faze Reabilitasaun Sai Fatin Izolamentu ba Kazu COVID-19 Grave

“Primeiru-Ministru bolu atu haree reabilitasaun ospitál Lahane ne’ebé Sentru Integradu Jestaun Krize propoin atu reabilita sai fatin tratamentu ba pasiente surtu Coronavirus ka COVID-19,” informa Ministru Salvador Pires ba jornalista, hafoin enkontru ho Primeiru-Ministru Taur Matan Ruak.

Ministru Salvador Pires dehan, orsamentu ba reabilitasaun edifísiu provizóriu ne’e  prevee kedas iha Orsamentu Jerál Estadu (OJE) 2019 ho valór rihun $300-liu ne’ebé sei tau fasilidade saúde no ekipamentu serbisu sira.

Konkursu públiku ba ezekusaun obra reabilitasaun Ospitál Lahane ne’e,  Ministru Salvador Pires tenik, hala’o tiha ona ho nia rezultadu konkursu hatudu katak kompañia ida ho naran Barnabak maka agora halo hela prosesu estudu ne’ebé aprezenta ona ba governu hodi hasa’e kapasidade akomodasaun ospitál antigu ne’e.

Ministru MOP Salvador hatutan, reabilitasaun ospitál urjente no importante tebes hodi ajuda SS-CIGC no ekipa médiku fó tratamentu espesiál ba pasiente Timoroan sira ne’ebé iha sintoma COVID-19.

Iha tempu besik ekipa tékniku sira husi MOP no SS-CIGC inklui kompañia ne’ebé manan konkursu sei hala’o enkontru no implementa projetu ho kategoria emerjénsia ne’e ho di’ak.

Kona-ba abitante sira ne’ebé daudauk ne’e okupa hela ospitál ne’ebé tempu Indonézia nian hanaran Wirahusada ne’e, Ministru Salvador Pires afirma katak, parte kompañia no governu sei haree kestaun impaktu sosiál no impaktu ambientál sira ne’e hodi trata ho dignu.

 Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here