Primeiru-Ministru Taur Matan Ruak, konvoka enkontru ho Koordenadór Destakamentu Reasaun Rapida, Aurélio Guterres no entidade relevante seluk. Imajen Tatoli/Egas Cristovão

DILI, 12 maiu 2020 (TATOLI) – Governu no Sentru Integradu Jestaun Krize (CIGC, sigla portugés) sei utiliza Ospitál Doutór Carvalho ne’ebé lokaliza iha Lahane, Munisípiu Dili sai fatin izolamentu ba pasiente COVID-19 no daudaun iha prosesu atu atu halo reabilitasaun.

“Kona-ba Ospitál tuan Lahane, semana kotuk prosesu ne’e prontu ona no espera katak semana rua nia-laran Ministériu Saúde bele realiza ona prosesu reabilitasaun. Provizóriamente sai hanesan fatin izolamentu, liuliu kazu sira ne’ebé maka grave. Maibé iha futuru sai hanesan óspital no kona-ba óbitu lokaliza iha Metinaru”, hateten Koordenadór Destakamentu Reasaun Rápida CIGC, Aurelio Guterres, hafoin ho ekipa hasoru malu ho Primeiru-Ministru, Taur Matan Ruak iha Palásiu Governu, tersa ne’e.

Notísia Relevante: Governu Iha Ona Alternativa Ba Fatin Izolamentu Pasiente COVID-19 Bainhira Vera Cruz Nakonu

Iha enkontru entre ekipa GIGC ho Xefe Governu, ekipa atualiza servisu relasaun ho atividade infraestrutura ba fatin izolamentu, kuarentena no óbitu ba COVID-19 ninian.

“Ami mai atualiza servisu relasaun ho atividade infraestrutura ba izolamentu, kuarentena no óbitu inklui mós jestaun ba aspetu tolu ne’e”, Aurelio adianta.

Koordenadór ne’e konsidera, preparasaun sira ne’ebé durante ne’e ekipa CIGC kompostu husi Ministériu Saúde no ministériu sira seluk halo ligadu ho propagasaun surtu COVID-19 iha Timor-Leste hatudu rezultadu di’ak.

“Bainhira COVID-19 ne’e laiha ona mós husi preparasaun sira ne’e bele ajuda mellora sistema fasilidade saúde iha munisípiu, sentru saúde, óspital referénsia no óspital nasionál”, nia salienta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here