Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/Egas Cristóvão

DILI, 08 maiu 2020 (TATOLI) – Ministru Negósiu Estrajeiru no Kooperasaun, Dionísio da Costa Babo Soares, informa semana oin Governu liuhosi Ministériu Finansa (MF) halo ona pagamentu ba otél sira ne’ebé maka Governu aluga sai fatin kuarentena obrigatóriu ba sidadaun ne’ebé maihusi nasaun afetadu COVID-19.

“Konsellu Jestaun Fundu COVID-19 halo reuniaun ba rekomedasaun husi Konsellu Interministeriál COVID-19. Nune’e reuniaun ohin hodi rezolve pagamentu sira ne’ebé maka antes ne’e prosesu ba COVID-19”, dehan Ministru Dionísio hafoin ramata enkontru ho ekipa Jestaun Fundu COVID-19, iha Salaun Ministériu Finansa, Aitarak-Laran, sesta ne’e.

Notísia Relevante: MS ho MKIA Konkorda Halo Pagamentu ba Kompañia no Otél

Antes ne’e, Ministériu Saúde (MS) maka toma konta diretamente kona-ba asuntu kuarentena ka aluga otél, nune’e mós kona-ba hahán, maibé bazeia rekomendasaun interministeriál katak tenke iha divizaun ba tarefa ne’ebé halo hamutuk entre ministériu lubuk ida maka responsabiliza ba pagamentu.

“Ezemplu ita hatene katak antes Sentru Integradu Jestaun Krize (CIGC, sigla portugés) estabelese, Ministériu Saúde asume prosesu ne’e tomak inklui husi preparasaun ba moras no rezolve moras ne’e, inklui kuarentena no hahán sira”, nia akresenta.

Montante orsamentu atu halo pagamentu ba otél sira ne’e, tuir Ministru Dionísio tuir saida maka hato’o ona husi MTKI no MS, ne’ebé maka aplika hamutuk ho MF katak pur volta millaun $6-resin.

“Ne’e  desde faze dahuluk, tanba ne’e tenke halo duni tanba liga direita ho COVID-19 maibé sei halo deskrisaun atu fahe ba item sira, tanba ne’e sei liu millaun $6”, nia salienta.

Tuir governante ne’e, atu halo pagamentu tenke liuhosi prosesu normál ne’ebé tenke tuir lei no tuir rejime jerál aprovizionamentu iha tempu normál tanba ne’e maka iha servisu barak.

Nia adianta, asuntu aluga otél ba fatin kuarentena no hahán ba ema iha kuarentena tuir loloos Ministériu Turizmu, Komérsiu no Industria (MTKI) maka halo maibé uluk MS maka kaer, entaun agora presiza rezolve asuntu ne’e tuir rejimentu aprovizionamentu ka rejime jerál aprovizionamentu nia atubele la’o tuir lei loloos.

“Ketaun legál sira ne’e maka ami rezolve iha enkontru ne’e no konkorda ona katak prosesu ne’e tomak MS maka responsabliza nafatin maibé iha implementasaun tenke iha tarefa konjunta entre MS no MTKI, hamutuk ho ministériu sira seluk ne’ebé maka tama hotu iha laran hanesan Ministériu Obra Públika (MOP) no Ministériu Edukasaun Juventude no Desportu (MEJD) no seluk tan”, dehan Ministru Dionísio.

Reuniaun Konsellu Jestaun Fundu COVID-19 konsege rezolve asuntu pagamentu ba otél hodi entrega prosesu tomak ba MF, liuliu Sekretáriu Tékniku Fundu COVID-19 ninian.

“Se lae pagamentu sira-ne’e barak mak seidauk halo no prosesu ne’e maka la’o hanesan ne’e. Tanba ne’e maka ita husu pasiénsia ba maluk sira hotu hanesan parseiru Governu no Estadu, liuliu setór privadu sira atu komprende situasaun  sira ne’e tanba la’ós fásil tanba ita tenke rezolve tuir lei”, nia realsa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here