DILI, 08 maiu 2020 (TATOLI) – Ministru Negósiu Estranjeiru no Kooperasaun, Deonísio da Costa Babo Soares, informa Governu posibilidade semana oin bele hahú halo ona pagamentu subsídiu ba estudante naun bolseiru sira iha estranjeiru ba faze dahuluk.
“Ita espera semana oin hanesan ne’e ita halo ona pagamentu ba sira, tuir loloos ne’e hau hakarak semana ida ne’e maibé prosesu maka la’o kleur oituan tanba verifikasaun”, dehan Ministru Dionísio hafoin ramata enkontru ho Konsellu Jestaun Fundu COVID-19 iha Ministériu Finansa, Aitarak-Laran, sesta ne’e.
Notísia Relevante: Governu Halo Regulamentu Subsídiu Estudante Timor-oan Naun Bolseiru Iha Estranjeiru
Tuir governante ne’e, prosesu ida faze dahuluk la’o hotu ona maibé verifikasaun sei kompleta no Konsellu Ministru husu atu halo pagamentu daudaun ona maibé prosesu ne’e la’o hela.
“Ha’u espera katak semana oin ka tempu badak nia-laran tenke haruka ona”, nia akresenta.
Nia refere kona-ba totál estudante naun bolseiru iha estranjeiru ne’ebé rejista ona iha faze dahuluk hamutuk pur volta 2.000-resin, ne’ebé kompostu husi nasaun oin-oin no iha Indonézia de’it hamutuk 1.000-resin.
Enkuantu estudante balun maka foin hatama sira nian dadus, sira tenke hein fali iha faze daruak.
“Ita tenke viabiliza orsamentu foun fali depende mós ba situasaun ne’ebé maka ita agora ba daudaun iha situasaun emerjénsia no situasaun COVID-19 rasik”, nia salienta.
Iha loron 29 abríl, Governu liuhosi Konsellu Ministru finaliza ona mekanizmu sira ligadu ho atribuisaun subsídiu ba estudante timor-oan naun bolseiru sira iha rai-li’ur.
Kona-ba determinasaun valór ba kada estudante mós finaliza ona no hein Dekretu-Lei hetan promulgasaun maka Konsellu Jestaun realiza fali reuniaun hodi halo aprovasaun hodi hahú atribui ona subsídiu ba estudante sira iha rai-li’ur.
Valór ba estudante iha kada nasaun sei la hanesan tanba depende ba kustu vida nasaun ne’ebé sira hela ba.
Orsamentu subsídiu ba estudante naun bolseiru iha estranjeiru, Governu prevee ona millaun $2, relasiona ho implementasaun Estadu Emerjénsia no pandemia COVID-19.
Prosesu pagamentu subsídiu ba estudante sira sei liuhosi konta bankária estudante ida-idak nian.
Jornalista: Natalino Costa
Editora: Julia Chatarina
