Primeiru-Ministru, Taur Matan Ruak, Prezide Reuniaun Konsellu Ministru iha Salaun Ministériu Finansas, Aitarak-Laran, kuarta(29/04).Imajen Tatoli/Egas Cristovão

DILI, 29 abríl 2020 (TATOLI) – Konsellu Ministru (KM) aprova Projetu Dekretu Governu, ne’ebé aprezenta husi Ministru Negósiu Estranjeiru no Kooperasaun, Dionísio da Costa Babo Soares, atu regula subsídiu ba estudante timor-oan naun bolseiru ne’ebé mak hela temporáriamente iha estranjeiru tamba situasaun COVID-19.

“Montante subsídiu sei selu fulan-fulan no depende ba kustu husi nasaun ida. Benefisiáriu sira mak hanesan estudante timor-oan mak la hetan bolsa no depende de’it ba apoiu finanseiru husi família ne’ebé hela iha Timor-Leste no sidadaun sira ne’ebé labele fila tamba fronteira sira taka”, refere nota imprensa ne’ebé Agência Tatoli asesu hafoin reuniaun ezekutivu iha Salaun Ministériu Finansa, Aitarak-Laran, kuarta ne’e.

Tuir dadus husi pakote estímulu Ekonóniku  ne’ebé Ministru Koordenadór Asuntu Ekonómiku interinu, Fidelis Manuel Leite Magalhães aprezenta ba Parlamentu Nasionál katak subsídiu ba estudante timor-oan iha estranjeiru ho kustu orsamentu $500.000 ba totál estudante 4.233 ne’ebé kada estudante sei hetan $150 kada fulan, durante fulan-tolu, hahú fulan-maiu.

Entretantu, alokasaun orsamentu husi Fundu COVID-19 ba Ministériu Negósiu Estranjeiru no Kooperasaun hamutuk $2.404.850.

Jornalista: Florencio Miranda Ximenes

Editora: Julia Chatarina

1 KOMENTÁRIU

  1. Obrigado wain tebes ba Governu Timor Leste tamba bele fasilita ona ninia ema sira nebe’e iha Estrangeiro hodi hetan ajudo finanseiro ba estudante Naun bolseiro ( Private inan aman mak selu rasik ). Maibe tuir lolos ne tenqui hahu husi fulan Marco mak mai, laos hahu husi fulan Maio tamba hare ba Corona Virus nebe’e oras ne’e sai mos prekupasaun ba mundu tomak inklui Timor Leste laos foin mak mosu iha fula maio ne maibe Corona Virus ne Misu hahu iha fulan Marco tamba husu governu tenqui toma atensaun didiak hodi hare mos ba parte sira ne’e. Maibe la iha buat ida tsmba ita nia nasaun mos hasoru problma Politika nebe’e la buat ida ami agradese boot ba governu Timor Leste tamba ajuda ona ami iha tempu defisil ida ne’e. Ikus liu hau hakarak hato’o ba Nai Ulun sira hotu tenqui fo liman ba malu hodi salva povu mukit sira husi situasaun hotu-hotu nebe’e mak Oras ne ita nia nasaun hasoru hela…
    **** Hamutuk lao ba Oin Halo Timor Naroman ba mundu Tomak *****
    By Nadys🙏✌💪💪

HAKEREK NO HATÁN

Please enter your comment!
Please enter your name here