Komisáriu CAC, Sergio Hornai, konvoka enkontru ho nia adjuntu na’in-rua iha Edifísiu CAC. Imajen/CAC

DILI, 23 abríl 2020 (TATOLI) – Komisaun Anti Korrupsaun (CAC, sigla portugés)  apela ba autoridade kompetente ne’ebé responsavel ba implementasaun serbisu prevensaun no kombate propagasaun surtu  Coronavirus ka COVID-19 atu asegura jestaun ezekusaun ba fundu ka orsamentu no material ka ekipamentu no rekursu  alokadu sira ho responsabilidade,  transparente no akuntavél.

“Nu’udar ita hotu hatene, oras ne’e daudaun mundu tomak preokupadu  ba  luta  hasoru propagasaun COVID-19 ne’ebé mak da’et  maka’as no lalais loos hosi emar ba emar, hosi nasaun ida ba nasaun seluk ne’ebé lori konsekuénsia grave ba saúde públiku, vida no ekonomia  iha planeta tomak. Virus ne’e transmite ho forma ne’ebé invizivel, transversal, la halo distinsaun, la haree tempu, espasu no ema.” Ne’e mak afirmasaun CAC nian liuhosi komunikadu imprensa ne’ebé haruka ohin ba ajénsia Tatoli.

Nune’e ezije no insiste esforsu koletivu hosi  sosiedade hotu-hotu atu tau nia atensaun no  rekursu  hodi luta kontra ameasa peste letál  foun ida-ne’e ne’ebé atualmente iha Timor-Leste iha kazu konfirmadu na’in-23, no na’in-ida kuradu.

CAC apresia esforsu órgaun soberania Estadu  Repúblika Demokrátika Timor-Leste, hahú hosi Prezidente  Repúblika, Parlamentu Nasionál, Governu  ho sosiedade sivíl ein-jerál ne’ebé hatudu vontade aas ba prekausaun propagasaun COVID-19.

Tuir CAC nia haree, medida sira ne’ebé responsive no proativu sira nu’udar rekoñesimentu ba  seriedade situasaun atuál ne’ebé ameasa saúde públika iha kontestu nasionál no internasionál sobre surtu COVID-19.  Governu foti tiha ona inisiativa hodi aprezenta proposta Estadu de Emerjénsia ba Prezidente Repúblika.

Hosi proposta Governu nian ne’e, iha loron 25 fulan-Marsu,  Prezidente da Repúblika husu autorizasaun ba Parlamentu Nasionál tuir alínea g) artigu 85.o Konstituisaun Repúblika no ikus mai Prezidente Repúblika Dekreta ho Dekretu Presidente da Repúblika nú.29/2020, loron 27 fulan-Marsu kona-ba Deklarasaun  Estadu Emerjénsia (EE), ne’ebé efetivamente tama iha vigor iha loron 28 fulan-Marsu. Tuir kedas ida ne’e Governu hasai Dekretu Governu nú.3/2020, loron 28 fulan-Marsu, kona-ba medida Ezekusaun Deklarasaun Estadu  Emerjénsia.

Aleinde ida-ne’e Governu mós hatudu vontade polítiku liuhosi aprezenta Proposta Lei Nú.13/V (2a) kona-ba autorizasaun ba realizasaun transferénsia estraordinária hosi Fundu Petrolíferu ho montante millaun $250 ne’ebé aprova ona iha PN, iha 02 Abríl 2020 no inisiativa balun ne’ebé sei diskute no aprova iha tempu sira tuir mai.

CAC hakarak hato’o nia apresiasaun ne’ebé aas ba profisionál saúde,  seguransa no defeza, indivíduu no grupu sosiál-sira ne’ebé hatudu sira-nia prontidaun atu serbisu no luta hodi prevene COVID-19 iha Timor-Leste, mézmu ho kondisaun no rekursu ne’ebé limitadu.

CAC fiar katak ho kolaborasaun no esforsu emar hotu nian iha Timor-Leste sei ultrapasa ameasa propagasaun surtu COVID-19 iha Timor-Leste.

CAC observa no rejista katak apoiu finanseira no lojístika ka ekipamentu komesa utiliza ba pesoál professional saúde no sidadaun-sira ne’ebé sujeita hela ba kuarentena. Maibé, CAC mós observa iha indísiu balun, lamentasaun no informasaun-sira ne’ebé provavelmente bele dezenvolve pratika/aktu relevante ba má-administrasaun, abuzu podér no korrupsaun.

Tanba ne’e, CAC hakarak alerta ba entidade kompetente atu konsidera no konsiente katak mézmu sirkunstánsia Estadu Emerjensia iha oin, maibé CAC enkoraja atu labele hasees-an hosi normas legál-sira  no prosedimentu administrativu ne’ebé vigora iha Repúblika Timor-Leste.

CAC ezije atu asegura kontrolu ba jestaun di’ak iha nia utilizasaun  rekursus finanseirus, orsamentu no materiaís ka ekipamentu-sira durante períodu difisil EE nia-laran.

CAC hakarak akonsella nu’udar pasu dahuluk nian atu reforsa kooperasaun ho instituisaun konjénere-sira hodi hametin realizasaun inspesaun auditoria no promove asaun iha kontrolu nian ba entidade kompetente dezignadamente iha asaun ba averiguasaun, investigasaun ka  inkéritu tuir natureza, misaun no kompeténsia CAC nian.

CAC husu ba indivíduu ka grupu-sira atu la-bele aproveita situasaun surtu  COVID-19  hodi buka vantajen patrimonial ka la’ós patrimonial ba interese pesoál ka grupu  nian.  Pratika sira ne’ebé potensiálmente bele mosu durante serbisu fornesimentu ai-han ba fatin kuarentena-sira, alojamentu ba okupante otél, alargamentu espasu sira finalidade estabelesimentu fatin kuarentena iha sidade kapitál Dili no munisípiu sira, akizisaun (aquisição) ba ekipamentu no medikamentu no servisu relevante sira kona-ba atendimentu COVID-19.

Hanesan instituisaun Estadu, CAC manifesta solidariedade no apoiu   ba  Estadu    hodi implementa no ezekuta medida-sira atu prevene no kombate surtu COVID-19. Mézmu, CAC alerta no apela ba entidade sira ne’ebé simu konfiansa no responsabilidade atu jere no ezekuta polítika finanseira no rekursu-sira seluk Estadu nian ho transparente, akuntavél no tuir  dalan sira lei nian.

CAC akompaña prosesu no evolusaun informasaun-sira balun ne’ebé dezenvolve iha sosiedade nia let, através serbisu Unidade Informasaun no Seguransa (UIS) CAC nian.  Ekipa sira hahú daudaun rekolla informasaun, simu  keixa  ka denunsia hosi públiku/sosiedade. Informasaun sira hotu ne’ebé tama sei liu hosi análize no halo averigusaun  bele nakfila ba faktu iha indísiu prátika krime.

CAC hakarak akonsella no alerta ba emar hotu-hotu  atu  providénsia no kautela ba  medida hotu  no  la fó-fatin ba aproveita  rekursus finanseirus, orsamentu no ekipamentu/lojistiku iha  Estadu Emerjénsia  ba interese pesoál ka grupu nian.

Estadu RDTL hasoru hela situasaun difisil,  indivíduu ka grupu ho obrigadu atu kumprimenta no kontribui pozitivamente ba situasaun ne’e  ho paixaun, moral, étiku no kumpre ba Lei atu kontribui prátika jestaun ne’ebé di’ak, moos, loloos no hasees-an hosi pratika-sira ne’ebé fó prejuizu ba interese komún povu nian.

Bainhira iha situasaun hanesan haktuir daudaun ba leten mak akontese iha situasaun Estadu Emerjénsia sei simu ka hasoru pena todan ka agravadu iha prizaun tuir Kódigu Penál Timor-Leste nu’udar sirkunstánsia agravante jerál no sansaun ekivalente seluk tuir lei subsidiaries sira seluk.

CAC sempre ho artikulasaun serbisu ho órgaun konjénere seluk  hodi husu ba entidade atu hala’o nia responsabilidade tuir portafóliu ka deskrisaun tarefa ne’ebé define ona, no CAC sei inter-kala ka halo interrupsaun ba serbisu instituisaun relevante sira   seluk ninian.

Mai kolabora no kontribui  ba desizaun polítika Estadu nian hodi aplika  Estadu Emerjénsia, apoiu  ba  programa no atividade estraordinária COVID-19, asegura jestaun, garante povu nia direitu asesu ba  saúde públiku no hakotu  surtu COVID-19 iha  Timor-Leste.

CAC enkoraja no husu ema hotu atu kumpre orientasaun Ministériu Saúde (MS) no Organizasaun Mundiál  Saúde (OMS) kona-ba pratika saúde di’ak no moris saudavel/ijiéniku, uza máskara iha  fatin públiku,   fase-liman ho sabaun kada minutu 20 no promove relasaun distansiamentu sosiál ho distansiamentu fízika.

Jornalista : Nelson de Sousa

Editór       : Francisco Simões

 

 

1 KOMENTÁRIU

  1. Parabens ba servisu CAC nian nb mk servisu makas tbs hodi tau matan ba osan povu nian maibe w hanesan sidadaun ida atu hatoo keisa deit la diretamente maibe liu husi komentario ida nee ho haraik an hatoo hela keisa ida nee ba CAC tamba agora dadauk iha ami nia suco Fatuquero Posto Railaco Municipio Ermera agora dadauk autoridade local halo kobransa 2.50$ (dois dollar sinquenta centavos) ba chefe familia sira nebe mak foin forma familia foun.
    Perguntas!
    1. Serarquia agora dadauk EE nia laran ami komunidade la iha tebes osan tamba la asesu ba merkadu maibe ho programa Governo atu ajuda nia povu iha situasaun ida hanesan ne’e tamba sa mak ami autoridade local halo fali kobransa ba trata visa da familia foun.
    2. Ho haraik an husu ba CAC atu halo intervensaun iha tempu badak nia laran tamba hahalok hanesan ne’e ami povu sira hatene katak ne’e korupsaun, obrigado hau fiar katak informasaun ida ne’e sei hetan solusaun.

HAKEREK NO HATÁN

Please enter your comment!
Please enter your name here