Konsellu Politika Nasional (CPN) CNRT ohin Hala’o Konferensia Imprensa iha Sede CNRT. Imajen/Egas Cristóvão

DILI, 06 maiu 2020 (TATOLI)—Konsellu Polítika Nasionál (CPN-sigla portugés) Partidu CNRT nian rezeita pozisaun deputadu sira bankada CNRT iha Parlamentu Nasionál ne’ebé husu Prezidente-Repúblika, Francisco Guterres ‘Lú Olo’, atu bolu partidu FRETILIN no CNRT tuur hamutuk ne’e la reprezenta no laiha orientasaun hosi lideransa partidu, Kay Rala Xanana Gusmão.

“Kona-ba asaun ba deputadu sira, ami sei reuni medida saida mak foti hodi husu responsabilidade ba deputadu ne’e hanesan atus individuál. CPN deklara sei hola medida no husu responsabilidade ba deputadu CNRT sira ne’ebé hala’o konferénsia imprensa iha loron 05 maiu 2020 ne’e,” Vise-Prezidente Partidu CNRT, Virgílio Smith, ne’ebé akompaña hosi Adjuntu Sekretáriu Jerál Partidu CNRT, informa liuhosi Konferénsia Imprensa iha Sede CNRT, Bairro dos Grilhos, Dili, kuarta ne’e.

CPN-CNRT konsidera konferénsia imprensa ne’ebé Deputadu CNRT sira halo iha loron 05 maiu 2020 iha Parlamentu Nasionál laiha orientasaun hosi partidu no konsidera deklarasaun hosi Deputadu CNRT sira-nia hanesan aktu individual ne’ebé la reprezenta partidu nia pozisaun.

CPN-CNRT reafirma iha 30 abríl 2020 atu fó apoiu tomak no autoriza Prezidente Partidu CNRT atu reprezenta CPN no partidu hodi hola medida no desizaun kona-ba situasaun polítika atuál.

CPN reafirma nia pozisaun no apoiu tomak ba Petisaun ne’ebé hatama ona ba Supremu Tribunál Justisa ka Tribunál Rekursu (TR) iha loron 05 maiu 2020.

Reafirma pozisaun CPN-CDN no estrutura nasionál to’o munisípiu ba Prezidente Partidu, Kay Rala Xanana Gusmão, hodi reprezenta partidu bazeia ba desizaun CPN iha 30 abríl 2020.

CPN reprezenta estrutura partidu nian tomak afirma nia konfiansa tomak no sein rezerva ba Prezidente CNRT, Kay Rala Xanana Gusmão.

“Kona-ba komunikasaun entre deputadu ho partidu la’o hela, só ke sira hola inisitiva hodi halo konferénsia imprensa ne’e laiha orientasaun hosi partidu,” hateten Vise-Prezidente Partidu CNRT, Virgílio Smith.

Notísia Relevante: Bankada CNRT Husu PR Bolu FRETILIN no CNRT Solusiona Impase Polítiku

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here