Imajen Espesiál.

DILI, 05 maiu 2020 (TATOLI)—Bankada Partidu Congresso Nacional da Reconstrução de Timor (CNRT) husu ba Prezidente Repúblika), Francisco Guterres ‘Lú Olo’, bolu partidu CNRT ho Partidu Frente Revolusionária Timor-Leste Independente (FRETILIN) tuur hamutuk solusiona impase polítiku iha rai-laran.

“Bankada CNRT Husu ba Presidente-da-Repúblika atu bolu Fretilin-CNRT tuur hamutuk hodi buka solusaun ba impase polítika,” dehan Vise-XEFE Bankada CNRT, Patrocínio dos Reis Fernandes, liuhosi konferénsia imprensa iha sala bankada CNRT, iha Parlamentu Nasionál, tersa ne’e.

Nia hatutan, Bankada CNRT haree ba situasaun polítika rai laran ne’ebé kontinua iha inserteza nia laran tanba mós partidu polítiku sira la sensível ba povu nia situasaun moris no mós situasaun ekonomia país nian.

Nune’e mós, nia dehan, tanba mós esforsu sira hodi halo violasaun ba Constituição-da-República atu atinzi objetivu poder hodi ignora tiha konfiansa povu-nian ne’ebé depozita ba partidu polítiku iha Eleisaun Antesipada.

Bankada CNRT hola pozisaun polítika afirma apoiu tomak ba Prezidente PN atu hola desizaun saída de’it atu fó susesu ba implementasaun Estadu Emerjénsia, tanba konfiansa maioria Povu iha Eleisaun Antesipada fó ba AMP (Bankada CNRT ho 21 kadeira) no partidu Fretilin.

“Tempu to’o ona atu halo tuir mandatu Povu ne’ebé depozita nia-votu barak liu ba partidu-rua ne’e. Ami husu atu partidu bo’ot rua ne’e tau sira-nia diferensa sira iha kotuk hodi hare’e de’it interese Povu nian. Husu ba Prezidente Repúblika atu hamriik hanesan Xefe Estadu, hamriik iha klaran hodi hamutuk ho partidu boot-rua (Fretilin no CNRT) atu buka solusaun ba impase polítika,” hateten Patrocínio.

Entretantu, Xefe Bankada CNRT, Duarte Nunes hateten, konferénsia imprensa ne’e hodi soe ba públiku ho objetivu hakotu impase polítiku.

Notísia Relevante: CNRT Konsidera Mosaun Destituisaun Hasoru Kompozisaun Meza PN Ne’e Issue De’it

Jornalista : Evaristo Soares Martins

Editór      : Cancio Ximenes

1 KOMENTÁRIU

  1. Karik, maun Bot sira iha duni intreses atu hadia povu ho nasaun doben ida nee, dalan diak atu soluziona ka hakotu impase politika durante nee, diak liu mak Lideransa politika sira, ho fuan bot forma Governmeno Grande Inklusaun. Atu nunee partidu sira nbe hetan asentu iha Parlemento ble hola parte iha Governasaun, hodi hakotu tiha impase politika ida nee. Se lae mak ita sei la kore an husi impase nee too 2021 mai, ble fo impaktu ba instablidade Estado nian.

    Obrigado husi Lourenco de Deus

HAKEREK NO HATÁN

Please enter your comment!
Please enter your name here