DILI, 06 maiu 2020 (TATOLI) – Situasaun nasionál kazu Coronavirus ka COVID-19 ne’ebé fó sai hosi Sala Situasaun Sentru Intergradu Jestaun Krize (CIGC) ba kuarta (06/05/2020), hatudu katak, númeru rekuperadu iha na’in-21 (konfirmadu 17 +provavel 4).
Notísia Relevante : CIGC La Deteta Família Hosi Profisionál Saúde Kona COVID-19
Tuir diskrisaun dadus ikus liu iha tuku 12:00 Otl, ne’ebé akumula husi CIGC katak, númeru teste 738 (horiseik 719), hein rezultadu 92, númeru kazu kumulativu kazu konfirmadu 24, kazu konfirmadu foun zero (0), kumulativu rezultadu negativu 622 (la iha mudansa ho horiseik) no númeru kazu baixa hitu (7).
Portavós CIGC nu’udar mós Koordenadór Forsa Tarefa Prevensaun no Metigasaun Surtu COVID-19, Sergio Lobo, liuhosi konferénsia imprensa iha Sentru Mídia CIGC iha Sentru Konvensaun Dili (CCD), klarifika katak, abitante ne’ebé iha konfinamentu obrigatóriu ka kuarentena 127, kompostu hosi iha fasilidade governu nian iha Dili 89 no iha fasilidade governu nian iha munisípiu 38.
Nia informa, iha auto-kuarentena 46 (iha munisípiu 46 no Dili zero (0)), nune’e, abitante ne’ebé pasa ona kuarentena obrigatóriu durante loron-14 nia-laran 2.059, kompostu husi iha Dili 1.639 no munisípiu 420.
Klarifikasaun
Liuhusi konferénsia imprensa ne’e, CIGC husu ba komunidade atu kuidadu-an nafatin no hakbesik ba fasilidade saúde sira bainhira hetan sintoma moras respiratóriu ka moras seluk.
“Ita nia problema la’ós COVID-19 de’it. Iha moras barak ne’ebé sei endémiku iha ita-nia rai. Tan ne’e, maski ita tenke kuidadu-an no tau atensaun atu evita COVID-19, ita la bele hamamar vijilánsia hasoru moras seluk,” afirma Sergio Lobo.
Nia hatutan, experiénsia iha tinan 2015 durante surtu Ébola iha Afrika hatudu katak ema mate barak liu tanba falta atensaun ba sarampu, malaria, HIV/SIDA no tuberkuloze duke mate tanba Ébola. Tan ne’e, Sergio Lobo tenik, Timoroan la’ós tenke tau atensaun maka’as atu kuidadu-an hodi labele kona COVID-19, maibé tenke tau atensaun ba moras hada’et no la hada’et seluk ne’ebé sei barak iha Timor-Leste.
Sergio Lobo hatutan, governu halo hela esforsu tomak atu kontinua serbisu esénsia ba komunidade, hanesan hala’o imunizasaun, hala’o kuidadu antenais no programa ba moras seluk hanesan baibain, enkuantu pesoál destakadu atu prevene no mitiga surtu COVID-19 hala’o nafatin sira-nia serbisu.
Apelu
Ikus liu husi konferénsia imprensa ne’e, Sergio Lobo lori CIGC nia naran kontinua halo apelu ba populasaun tomak atu kontinua kumpre regra distansiamentu fíziku mínimu metru ida, tur hakmatek iha uma no evita halibur-malu.
“Keta rona boatu sira no notísias husi fonte ne’ebé la loos. Rona no fiar de’it informasaun sira ne’ebé sai husi Konferénsia Imprensa ne’ebé SS-CIGC realiza loron-loron,” afirma Sergio Lobo.
CIGC husu atu populasaun kontinua pratika ijiene pesoál, liu-liu fase liman beibeik no liman labele kona-ba inus, matan ho ibun no uza máskara bainhira sai husi uma
“Ita-nia esforsu atu mantein distansiamentu fíziku no observa ijiene pesoál, inklui fase-liman beibeik mak sei bele hadook ita husi infesaun COVID-19,” hateten Sergio Lobo.
Jornalista : Eugénio Pereira
Editór : Francisco Simões
