Prezidente Partido CNRT, Kay Rala Xanana Gusmão, Gusmão. Imajen/Egas Cristóvão

DILI, 30 abríl 2020 (TATOLI)—Prezidente Koligasaun Aliansa Maioria Parlamentár (AMP) atuál Prezidente CNRT, Kay Rala Xanana Gusmão, afirma sei hamutuk ho partidu koligasaun sira sei hatama karta petisaun ba Tribunál Rekursu (TR) atu husu konstitusionalidade.

Xanana informa deklarasaun ne’e, liuhosi Konferénsia imprensa ne’ebé partisipa hosi Sekretáriu Jerál Partidu Demokrátiku (PD), António da Conçeição, Prezidente En-Ezersísiu UDT, Rodolfo Aparício Guterres, estrutura UDT, Frente-Mudansa no Estrutura PUDD.

“Ohin, ami ho advogadu sira, ita atu hatama asaun ida iha tribunál para ita-nia sosieadade maioria jovens hodi hatene. Ami katuas ona, tenke haree ba imi oinsá ba Estadu Direitu Demokrátiku. CNRT partidu ne’ebé foin mosu, esperiénsia laiha, lahatene ukun maibé iha responsabilidade ba povu no rai ida-ne’e. Ita, ohin loron tama iha krize institusionál. Konteudu hosi karta petisaun sei haruka ba Tribunál hodi bele haree ninia legalidade sira tuir Konstituisaun RDTL,” Xanana Gusmão, informa liuhosi Konferénsia Imprensa, iha sede CNRT, Bairro dos Grilhos, kinta ne’e.

Xanana esplika, uniku solusaun tenke kumpri Konstituisaun RDTL artigu 86 alínea f dizolve Parlamentu Nasionál no konvoka Eleisaun Antesipada tanba konsidera hanesan baze konstitusionál, laiha opsaun seluk.

Prezidente Partido CNRT, Kay Rala Xanana Gusmão, Hamutuk ho Jurista Timoroan. Imajen/Egas Cristóvão

Xanana argumenta artigu 86 alíena f hateten, hakotu Parlamentu Nasionál, iha kazu krize boot institusionál nian ne’ebé labele iha formasaun Governu ka aprovasaun Orsamentu Jerál Estadu nian, iha tempu naruk liu loron neen-nulu (60), bainhira rona tiha ona partidu polítiku sira-ne’ebé hetan kadeira iha Parlementu Nasionál no rona Konsellu-Estadu, iha tempu ne’ebé laiha kdasar jurídiku atu hala’o disolusaun, tenke haree tuir regra iha Artigu 100.

Tuir Konstituisaun RDTL artigu 100 (Disolusaun), alínea 1 esplika Parlamentu Nasionál labele hetan disolusaun iha fulan neen nia laran, liutiha eleisaun ne’ebé hili nia ka iha semestre ba dala ikus mandatu Prezidente Repúblika nian ka durante vijénsia estadu serku ka estadu emerjénsia nian, tan laiha kdasar jurídiku atu halo disolusaun.

Alínea daruak hosi artigu ne’e mós hateten, disolusaun Parlamentu Nasionál nian la hamate mandatu Deputadu sira-nian to’o Parlamentu nia reuniaun dala uluk, liu tiha eleisaun subsekuente sira.

“La’ós kestiona señor Lú Olo maibé tenke defende Konstituisaun RDTL nune’e ema hotu respeita lei,” Xanana Gusmão hateten.

Horisehik, Xanana hateten, Primieru-Ministru Taur Matan Ruak ba dehan sira aprezenta membru governu, ida ne’e PR Lú Olo la estuda ida no PM lori membru governu foun, ida ne’e prezidente haluha tiha. Maibé, tuir loloos PR mak tenke fó ezemplu ba ami katak Prezidente kumpre K-RDTL hodi ejize mai atu kumpre mós.

Xanana afirma, Prezidente Repúblika tenke hatene órgaun soberanu iha idak-idak nia kompeténsia maibé husik hela de’it to’o krize mosu.

Xanana subliña, buat hirak ne’e hotu ne’e mak Orsamentu Jerál Estadu (OJE) dala-rua tuituir-malu la pasa.

“Mosu ho Orsamentu Jerál Estadu, AMP iha enkontru lubuk ida hodi fó hatene malu maibé la rona malu, komu la rona malu, laiha ona konfiansa ba malu,” Xanana dehan.

Xanana haktuir, Governu deside retira proposta OJE 2020 ho montante biliaun $1.995 iha loron 3 dezembru 2019 (faze jeneralidade loron daruak), tanba osan ne’e boot demais.

Xanana dehan, Governu aprezenta tán proposta orsamentu foun ho biliaun $1,668 maibé proposta la pasa tanba halo tuir saida mak haktuir iha Lei Orsamentu no Jestaun Finanseira no problema boot iha ezekusaun orsamentál Governu nian.

“Ita labele tau osan selu malu hela de’it, hanesan selu asesór sira. Tanba ne’e mak baze. Tanba ne’e mak orsamentu la liu,” Xanana dehan.

Proposta OJE ho montante Biliaun $1,668 la pasa iha jeneralidade loron datoluk, iha loron-sesta (17/1/2020) ho votu a-favór 13, kontra 15 no abstensaun 25.

Entretanu, hahú hosi 17 janeiru no 17 marsu 2020 (loron-60), estadu seidauk iha Orsamentu Jerál Estadu (OJE) no daudaun ne’e kontinua ho orsamentu duodesimál de’it.

“Aliansa ne’ebé tama iha Governu tenke tuir regra no normál. La’ós tama Governu bele halo kontente de’it. CNRT iha nia prinsípiu,” nia hateten.

Xanana akresenta, haree ba estadu laiha osan entaun Prezidente-Repúblika, Francisco Guterres ‘Lú Olo’ anunsia opsaun tolu, ida Eleisaun Antesipa mak última rekursu, rua partidu polítika sira halo movimentu politika no ikus liu VIII Governu sei kontinua to’o Governu foun mosu.

“Buka malu ne’e la’ós CNRT mak buka ka partidu seluk mak buka maibé hotu-hotu buka-malu tuir rekomendasaun Prezidente-Repúblika nian,” nia hateten.

Tanba ne’e mak Partidu neen (6) kompostu hosi CNRT, KHUNTO, PD, UDT, FM no PUDD asina akta koligasaun iha loron sábadu, 22 fevereiru 2020, iha sede CNRT, Bairro dos Grilhos, Dili.

Akta ne’e asina hosi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta, dos Santos, Prezidente En-Ezersísiu UDT, Rodolfo Aparício Guterres, Prezidente En-Ezersísiu Frente-Mudansa (FM), Egídio de Jesus no Prezidente PUDD, António de Sá Benevides. Maibé partidu hirak ne’e, KHUNTO deside retira hosi koligasaun ne’e iha loron-kuarta, 29 abríl 2020.

Nune’e koligasaun foun kontinua hatama pedidu audiénsia daruak, maibé Xanana dehan to’o oras ne’e la hetan kontaktu hosi Xefe Estadu maibé sei Xefe Estadu dehan dehan sei estadu no sei estuda to’o agora ne’e.

Maibé, tuir planu, karta petisaun ba Tribunál Rekursu (TR) atu husu konstitusionalidade ne’e, Aliansa Maioria Parlamentár (AMP) sei entrega ba Tribunál Rekursu iha segunda-feira (04 maiu 2020) semana oin mai.

Notísia Relevante: Taur Sei Aprezenta Lista Membru Governu Foun ba PR

Jornalista : Evaristo Soares Martins

Editór      : Cancio Ximenes

1 KOMENTÁRIU

  1. Nai PR tau interese ba nia partidu deit, ba nia ema deit, la tau interese ba povo no nasaun nia interese Coligasaun ne’ebe lidera husi CNRT, nai Presidente estuda la hotu, estuda ba estuda maibe la kompriende, estuda to ohin loron nia resposta la iha maibe membro governo foun ne’ebe indijitadu husi PM, Nai PR la estuda tan sente fasil los tanba nia ema ne’ebe mak mai husi nia partidu rasik. agora nai PR la hare ba konstituisaun RDTL ona, nega no haluhan ona timor nia lei rasik ne’ebe uluk nia mak PP hodi halo lei KRDTL, maibe agora nia la kompriende fali ona, haluhan fali ona no nega fali ona timor nia lei inan KRDTL. obrigadu.

HAKEREK NO HATÁN

Please enter your comment!
Please enter your name here