Membru PNTL ho F-FDTL halo investigasaun iha lokál akontesimentu, iha área Lebukoe, Aldeia Delesuvati, Suku Vaviquinia, Postu Maubara, Munisipiu Liquiça, sesta (01/05/2020). Imajen/Eugénio Pereira

MAUBARA, 01 maiu 2020 (TATOLI)-Familia vítima Isac dos Santos  da Silva, ho autoridade lokál iha area Lebukoe, Aldeia Delesuvati, Suku Vaviquinia, Postu Administrativu Maubara, Munisípiu Liquiça, husu ba Komandu Polísia Nasionál Timor-Leste (PNTL) atu prosesa autór ho inisiál JAS nu’udar membru PNTL ho diviza Ajente Polísia, lori pistola ka arma povu-nian tiru vítima iha Maubara, kinta (30/04/2020), tuku 18:11 Otl.

Notísia Relevante : Ema Deskoñesidu Tiru Kanek Isac iha Maubara

Família halo konfernesia imprensa iha vitíma Isac nia uma iha Maubara, Liquiça, sesta (01/05/2020). Imajen/Eugénio Pereira

Liuhosi konferénsia imprensa, sesta (01/05/2020), iha vítima Isac nia uma iha Maubara, Jino da Costa Pereira Soares Martins, nu’udar reprezentante família vítima, hateten, família lamentavel tebes ho aktu autór JAS nian ne’ebé nu’udar membru PNTL tuir loloos tenke asegura povu nia vida, maibé lori fali arma Estadu nian hodi tiru hasoru povu.

Isac dos Santos da Silva (tinan 33) hetan tiru hosi autór JAS ho kondisaun kanek boot tanba vala-musan kona iha knotak borus ba kotuk no kona-moos iha liman no oras ne’e hala’o hela tratamentu intensivu iha Ospitál Nasionál Guido Valadares (HNGV) Dili.

Liuhosi konferénsia imprensa ne’e, família sira liuhosi Jino da Costa Pereira Soares Martins, fó sasin katak, momentu ne’ebá Isac hamriik hela iha nia uma-oin no derrepente karreta baskulante ida tula sasán nakonu hosi Dili liu mai atu ba Loes to’o iha uma oin, halai neineik no autór JAS ne’ebé mak kondús karreta baskulante ne’e hasai kedas pistola tiru ba vítima Isac no kona vítima nia-liman ho knotak no borus ba nia kotuk-laran hodi halo vítima monu kedas ba rai.

Jino da Costa Pereira Soares Martins haktuir, bainhira vítima Isac monu tiha, autór membru PNTL ho inisiál JAS ne’e tun hosi karreta-leten kontinua karrega pistola hodi ameasa mós joven na’in rua ne’ebé hamriik besik iha fatin akontesimentu.

Autor membru PNTL ne’e kontinua sa’e fali karreta baskulante ne’e hodi halai liuhosi Marcelino Pukelete nia-uma no kontinua liubá área Kaikasa no Gugleur ne’ebé pertense ba  area jurizdisaun Maubara nian.

Ho akontesimentu ne’e, família ezije ba Komandu PNTL atu loke prosesu investigasaun kle’an ka profunda ba autór membru PNTL  ne’e hodi lori ba prosesa tuir Lei mak vigora iha Timor-Leste.

“Ami komunidade no família hosi vítima husu ba parte kompetente hanesan instituisaun PNTL atu prosesa autór JAS nu’udar membru  PNTL Sub-Unidade Batallaun Orden Públiku (BOP) inisiál JAS tanba hakanek ami nia família no uza arma estadu-nian hanesan pistola hodi kontra Lei no perturba Orden Públiku,”  Jino da Costa Pereira Soares Martins hateten.

Familia sira husu ba Komandu PNTL atu halo kontrolu másimu no rigór ba membru PNTL ne’ebé  lori arma ba uma fora hosi oras serbisu atu nune’e la bele akontese tan hanesan kazu ida-ne’e.

Familia sira husu ba Governu Timor-Leste liuhosi Ministériu Interior, Komandu PNTL atu kria komisaun investigasaun konjunta independente ne’ebé hola parte  mós  Provedoria Direitu Umanu no Justisa (PDHJ), Komisaun B Parlamentu Nasionál, Asosiasaun HAK hodi loke prosesu investigasaun ida kle’an no independente.

Reprezentante família ne’e mós rejeita informasaun kona-ba vítima ho nia-maluk  sira balun maka halo asaltu ba karreta nu’udar informasaun ne’ebé laloos.

“Ami rejeita informasaun dehan, ami nia alin Isac maka halo atake ba karreta ne’e laloos, tanba nia hetan tiru kedas iha uma-oin bainhira nia hamriik hela iha nia uma-oin,” tenik Jino.

Iha fatin hanesan, inan husi vítima, Paulina da Silva Bicau, hateten, nia triste no husu atu Komandu PNTL hasai autór JAS hosi  instituisaun polísia tanba aktu ne’ebé autór halo violasaun total ba Konstituisaun no estatutu PNTL nian.

“Ha’u husu nai-ulun sira atu prosesa kazu ne’e, tanba ha’u la simu atu polísia ne’e mai  lori fali pistola estadu nian no povu nian tiru ha’u nian oan. Ha’u husu hasai nia farda tau nia ba kadeia,”  hateten Paulina da Silva Bicau.

Paulina ho matan-been lia-tun dehan, “Kilat ka pistola ne’e estadu nian, imi membru PNTL kaer atu defende estadu no defende ami povu, agora imi mai tiru fali ami nia-oan ne’e oinsá.”

Vítima Isac dos Santos da Silva nu’udar oan-mane ikun hosi maun-alin na’in-rua no feto na’in-ida no vítima Isac nu’udar peskadór no negosiante ambulante ne’ebé halo atividade fa’an gazolina.

Vítima Isac forma ona família no oan mane boot hela ho família sira iha Ainaro no nia kaben rasik daudaun ne’e serbisu hela iha Reinu Unidu.

Iha fatin Xefe Suku Vaviquinia, Alcino Nunes, triste ho akontesimentu ne’e no husu Komandu PNTL presiza kontrola membru sira bainhira halo atividade privadu labele uza arma ka lori arma ba uma.

“Situasaun ne’e halo ami komunidade suku ne’e pániku tanba foin primeira-vés ami nia ema hetan tiru. Ami lamenta tebes autór JAS nia aktu ne’e,” Xefe Suku Alcino Nunes hateten.

Xefe suku ne’e rasik organiza ona grupu juventude sira hodi kontinua mantein pás no husu família koopera nafatin ho polísia hodi fasilita prosesu investigasaun.

“Hodi kalan, ha’u halo kedas enkontru ho joven sira inklui família para labele kria fali problema ho autór  nia família sira hodi fó fiar ba polísia atu prosesa kazu ne’e tuir lei,” nia hateten.

PNTL Postu Maubara no Liquiça daudaun ne’e koopera ho membru FALINTIL-Forsa Defeza Timor-Leste (F-FDTL) halo ona investigasaun iha lokál akontesimentu no asegura seguransa iha fatin akontesimentu hodi evita problema entre grupu juventude sira.

Jornalista   : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here