Vitima Isac dos Santos, hala'o hela tratamentu intensivu iha HNGV, kinta (30/04/2020). Imajen/Espesiál

DILI, 30 abríl 2020 (TATOLI) – Ema deskoñesidu, ohin, purvolta tuku 18:11 Otl, uza pistola tiru kanek Isac dos Santos, iha area Lebukoe, Suku Vaviquina, Postu Administrativu Maubara.

Emvolku ne’ebé Polísia foti iha fatin akontesimentu. Imajen/Espesiál

Informasaun hosi sasin balun ne’ebé lakohi públika nia identidade, informa ba Ajénsia Tatoli katak, akontesimentu ne’e derrepente de’it bainhira vítima Isac dos Santos, tuur hemu hela kafé iha nia varanda.

Momentu ne’ebá, sasin haktuir-tan, karreta kamioneta ida tula sasán nakonu hosi diresaun Dili atu ba Bobonaro, halai ho velosidade, maibé mai to’o iha vítima nia uma-oin redús tiha no ema deskoñesidu na’in-rua iha karreta-laran hatais ropa sivíl hasai pistola  tiru kedas ba vítima nia isin-lolon.

Tiru tiha Isac, sasin ne’e hateten, karreta kamioneta ne’e halai ho velosidade ba diresaun Bobonaro nian.

“Polísia Eskuadra Maubara halo kontaktu kedas ba Ambulánsia hodi lori vítima Isac ba Sentru Saúde Maubara no kontinua lori hikas ba Ospitál Nasional Guido Valadares (HNGV) Dili hodi hetan tratamentu intensivu tanba bala-musan kona vítima nia knotak-sorin borus ba kotuk,” hateten sasin ne’e.

Tuir informasaun katak, Polísia Nasional Timor-Leste (PNTL) Munisípiu Liquiça buka tuir kedas ema deskoñesidu ne’e no liuhosi komunikasaun ativu ho autoridade Polísia Postu Loes nian konsege kaptura ona karreta kamioneta ne’e ho nia motorista, inklui suspeitu ne’ebé uza pistola tiru vítima Isac dos Santos.

Hosi sorin seluk, Komandante Polísia Munisípiu Liquiça Interinu, Superintendente Asistente, Luis da Silva, ne’ebé Ajénsia Tatoli halo konfirmasaun via telefónika kona-ba akontesimentu ne’e hateten,  nia  seidauk bele fó informasaun kle’an, tanba parte polísia investigasaun sei rekolla hela dadus.

“Agora daudaun ita-boot sira hein uitoan lai, tanba ita rekolla dadus. Aban mak foin bele fó sai loloos kronolojia ne’e oinsá,” hateten Komandante Luis da Silva.

Kona-ba informasaun balun ne’ebé iha katak suspeitu ne’e membru PNTL ida nu’udar mós Liquiça-oan ida, maibé parte Polísia seidauk bele fó konfirmasaun loloos no detallu tanba sei iha hela investigasaun nia-laran.

Komandante Polísia Eskuadra Maubara, Leopoldina dos Santos ho ekipa too kedas fatin akontesimentu hodi halo investigasaun no hili mós involku mamuk ida iha fatin akontesimentu.

Parte Polísia Maubara mós halibur ona dadus hosi testemuña balun ne’ebé haree akontesimentu ne’e iha lokál akontesimentu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here