Lider Karizmatiku, Kay Rala Xanana Gusmão, mobiliza estudante UNPAZ halo limpeza jerál. Imajen/Media UNPAZ

DILI, 17 marsu 2020 (TATOLI) – Dezde akontese inundasaun iha Dili iha sesta loro-kraik to’o kalan (13/03/2020), lori  atensaun ida sériu ba Timoroan hotu iha Timor no iha mundu.

Notísia Relevante : Jenerál Lere Louva Karidade Hosi Xanana no Governu ba Vítima Inundasaun

Timoroan-ua’in aprezenta sira nia jestu solidariedade ba vítima inundasaun iha bairru sira hanesan Balide, Becusse, Quintal-Boot, Quintal-Ki’ik, Santa Krús, Audian, Bidau to’o Becora.

Hosi ema-lubun ne’e, Kay Rala Xanana Gusmão, nu’udar lider karizmátiku hatudu mós nia  solidariedade kle’an no kmo’ok tebes. Nune’e, iha loron tuir mai, sábadu (14/03/2020), nia-rasik hola inisiativa tuun direita ba observa kondisaun vítima-sira  ne’ebé afetadu, inklui identifika fasilidade públiku balun ne’ebé hetan estragu.

Xanana ho nia karizma halibur komunidade afetadu-sira  tuun hamoos  fo’er no fase tahu-dodok  ne’ebé kuaze atu perturba asesu estrada públiku, inklui hamoos tahu-dodok ne’ebé tama to’o komunidade nia horik-fatin.

Ho kolaborasaun no kontribuisaun hosi autoridade lokál, instituisaun relevante-sira, Xanana mobiliza komunidade konsege hamoos bairru-balun no hasai tahu-dodok sira iha fatin sira ne’ebé afetadu maka’as.

Haree ba kbiit no forsa estudante universitáriu   sira nian mós hanesan poténsia ida atu bele kontribui hamoos fo’er ho tahu  hosi inundasaun ne’e, horiseik komandante ein-Xefe FALINTIL, Kay Rala Xanana Gusmão, ba “dere” odamatan Magnífiku Reitór Universidade da Paz (UNPAZ), Adolmando Soares Amaral nian, hodi husu autorizasaun mobiliza estrutura UNPAZ ho estudante-sira hodi ba halo limpeza iha area Lecidere to’o Ospitál Nasionál Guido Valadares (HNGV).

Komunikadu imprensa ne’ebé Ajénsia Tatoli asesu hosi pájina ofisial mídia UNPAZ, ohin, relata katak, kontribuisaun UNPAZ nian ne’e atu bele ajuda hakmaan vítima sira nia sofrimentu hafoin inundasaun.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here