Fuansionariu sira iha aeroportu Internasional Nicolao Lobato uja masker hodi prevenean husi coronavirus antes halao sira nia atividades.Imajen/Antonio Goncalves

DILI, 16 marsu 2020 (TATOLI)—Prezidente Tribunál Rekursu (PTR), Deolindo dos Santos, hasoru malu ho Prezidente Parlamentu Nasionál, Arão Noé de Jesus Amaral, hodi diskuti medida antesipa Coronavirus (COVID-19) tanba tribunál presiza diploma hosi parlamentu no governu.

Prezidente Tribunál Rekursu ne’e hasoru malu Arão Noé, tanba haree ba Coronavirus ne’ebé sai preokupasaun mundu tomak nian no nasaun viziñu Austrália no Indonézia mós moras ne’e iha tiha ona.

“Buat ne’e ita presiza haree iha kontestu estadu entaun ha’u mai ko’alia hodi haree buat balu entermu tratamentu. Agora iha medida balu ne’ebé ke relasaun ho serbisu tribunál nian mak ne’e, enkuantu buat ne’e akontese karik halo nusá mak bele iha medida ne’ebé ke bele fó solusaun ba problema. Se ita hasoru tanba tribunál labele para iha prosesu balu ne’ebé ke mezmu moras mai maibé agora tanba presiza diploma ruma. Lae, tribunál labele halo buat ida bainhira buat ne’e akontese,” dehan Deolindo dos Santos, ba jornalista sira hafoin hasoru malu ho PPN, Arão Noé, iha Parlamentu Nasionál, segunda ne’e.

Prezidente Tribunál Rekursu fó ezemplu, bainhira polísia kaer ema ruma iha momentu Coronavirus ne’e akontese tanba halo krime no polísia labele liberta, tanba ne’e presiza diploma ruma.

Sintoma coronavirus. Imajen:bncampinas.com

“Entaun hakarak ka lakohi presiza medida balu ne’ebé ke bele fó solusaun, kuandu buat ne’e akontese karik fó prazu suspensaun halo nusá. Hirak ne’e hotu tenke mai hosi diploma ruma. Ideia ne’e mak ami ko’alia. Sé moras ne’e akontese karik nia solusaun halo nusá tanba ida-ne’e kompeténsia parlamentu nian,” nia dehan.

Nia afrima, la’ós dehan moras ne’e akontese ona maibé presiza medida ruma tenke liuhosi diploma ruma tanba laiha diploma ruma labele halo buat ida.

Prezidente Tribunál Rekursu husu parlamentu no governu atu haree medida ruma hodi bele fó solusaun karik coronavirus ne’e akontese.

“Timor ne’e iha relasaun ho kultura. Kuandu ema ida mate sei tuur hamutuk mak hakoi, seraké ema ida mate (coronavirus) sei tuur hamutuk ba hakoi. Entaun ida-ne’e presiza medida liuhosi diploma ruma hodi obriga,” nia hateten.

Maske nune’e, nia dehan, oras ne’e parte Ministériu Saúde no ministériu relevante haree hela no buka solusaun hodi antesipa bainhira moras ne’e tama territóriu Timor-Leste.

Notísia Relevante: Prevene Coronavirus, Governu Halo Preparasaun iha Fatin Tolu

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here