Primeiru-Ministru, Taur Matan Ruak. Imajen TATOLI/ Egas Cristovao

DILI, 12 marsu 2020 (TATOLI)–Primeiru-Ministru, Taur Matan Ruak informa, ekipa interministeriál ba preparasaun prevensaun Coronavirus, oras ne’e hahú halo preparsaun fatin tolu mak hanesan Vera Kruz, Formosa no Tibar.

“Sira halo hela preparativu iha fatin tolu. Ida maka Formosa hanesan fatin halo triazen, no Vera Cruz hanesan fatin ba kuidadu intensivu, no mós se númeru ne’e aumenta, ita ba Tibar,” dehan Pimeiru-Ministru ba jornalista sira hafoin hala’o soru-mutu ho PR iha Palásiu Preziente Nicolau Lobato, Bairru-Pité, Dili, ohin,

Ho situasaun oras ne’e daudaun, Xefe Governu ne’e informa, Governu iha medida rua atu halo hodi antesipa coronavirus.

“Primeiru mak oinsá kontrola atu iha li’ur la bele tama. Segundu, prepara ita-nia an, atu nune’e bainhira iha kazu ruma akontese iha ita-nia rai laran kona-ba coronavirus, ita bele responde,” nia dehan.

Entretantu, nia haktuir, komisaun interministeriál ida ne’ebé Governu harii lidera husi Ministra Saúde En-ezersísiu hola parte husi Ministériu Administrasaun Estatál (MAE), Ministériu Finansa (MF), Ministériu Negósiu Estranjeiru no Kooperasaun (MNEK), Ministériu Defeza (MD) no Ministériu Interiór (MI), no mós ekipa tékniku ida tan.

“Ami mós haree hela alternativa balun, atu husu apoiu husi komunidade internasionál, ho alternativa balun tan hodi prepara liután karik nesesáriu, bele hakbiit ita-nia an, hodi bele responde situasaun ida-ne’e. Tanba país boot sira ne’ebé iha sistema saúde di’akliu iha mundu maibé sira laiha kbiit atu rezolve problema ne’e, satán Timor-Leste ho nia sistema ne’ebé sei fraku,” nia subliña.

Kona-ba ne’e, Xefe Governu ne’e dehan, Prezidente Repúblika aseita tanba ne’e iha tempu badak Xefe Kaza Sivíl sei konvida Governu atu lori ekipa tékniku sira mai halo aprezentasaun ida, atu fó ideia jerál ida ba Prezidente Repúblika, atu nune’e hosi ida-ne’e bele fó ninia mensajen ba povu kona-ba coronavirus.

“Relasiona ho desizaun Governu hodi hapara movimentasaun husi nasaun haat maibé la inklui Indonézia, ita haree sira ne’ebé mak boot liu, númeru barak liu, intensidade maka’as liu. Maibé, ita mós preparadu se nesesáriu atu taka duni ita-nia an, tempu ruma ita sei taka. Emerjénsia, ita sei halo ida-ne’e. Ida-ne’e mós, ohin ha’u informa ba Prezidente Repúblika, karik situasaun obriga atu izola ita-nia an, ita halo,” nia hateten.

Antes ne’e, Reprezentante Organizasaun Mundiál Saúde (OMS), Rajesh Pandav heteten, to’o ohin loron Timor-Leste (TL), seidauk konfirmadu afetadu coronavirus.

Maski nune’e, iha nível globál, Repzentante OMS ne’e informa deteta ona kazu konfirmadu purvolta rihun atus-ida no akontese iha nasaun atus-ida resin. Husi kazu sira-ne’e, rejista rihun ualu-nulu resin iha Repúblika Populár Xina no rihun rua-nulu resin iha nasaun seluk. Husi númeru sira ne’e ema kuaze rihun-tolu mate iha Xina no atus-haat husi nasaun sira seluk, nune’e taxa mortalidade ba COVID-19 pursentu 3.4.

Notísia Relevante: PM Taur Orienta Liña Ministériu Fó Atensaun Másima Ba Problema Coronavirus

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here