Inundasaun iha Kapitál Dili, 13 marsu 2020. Imajen/Dok.Tatoli

DILI, 14 marsu 2020 (TATOLI) – Hafoin udan boot ne’ebé akontese kuaze oras 4 iha Kapitál Dili sesta ne’e, hamosu inundasaun forte kuaze iha kapitál laran iha parte Sentru no Leste nian.

Tuir nota ne’ebé Agência Tatoli asesu hosi Gabinete Primeiru-Ministru relata, área sira ne’ebé afetadu maka’as mak hanesan Becora, Becusse, Bidau, Bemori, Caicoli, Maloa no Prezidénsia Repúblika.

Haree ba situasaun ne’e, Primeiru-Ministru (PM), Taur Matan Ruak orienta kedas Ministru Obra Públika, Salvador Eugênio Soares dos Reis Pires no Sekretáriu Estadu Protesaun Sivíl, Alexandrino de Araújo, hodi observa direta ba terenu hodi halo evakuasaun emerjénsia ba vítima sira ne’ebé afetadu maka’as ba inundasaun.

Enkuantu Ministru Salvador iha sesta kalan hafoin udan maka’as, tun direita hodi halo observasaun ba fatin sira-ne’ebé hetan estragu maka’as hodi orienta Institutu Jestaun Ekipamentu (IGE-sigla portugés) atu halo normalizasaun lalais ba fatin sira-ne’e, nune’e movimentasaun bele la’o ho normal filafali.

Hosi dezastre naturál ne’e, mota lori ema na’in-5, na’in-2 mak mate, no na’in-3 konsege salva no lori halai ba Hospital Nacional Guido Valadares (HNGV).

“Vítima sira hamutuk na’in-194 mak hodi kalan evakua kedas ba fatin evakuasaun tolu ne’ebé Sekretaria Estadu Protesaun Sivíl (SEPS) prepara mak hanesan Igreja Bidau Mota Klaran akumula ema na’in-72, Sentru Operasaun Desastre iha Bemori na’in-80 no iha Sekretaria Estadu Protesaun Sivíl ninia edifísia akumula ema na’in-42”, haktuir nota ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here