Palacio Prezidente.Imajen/Antonio Goncalves

DILI, 16 marsu 2020 (TATOLI)—La imajina! Palásiu Prezdiente Nicolau Lobato ne’ebé harii iha Bairru Pite, Dili, ho estilu arkitetóniku no ho arkitetu moderna ne’e, iha sesta (13/3/2020) lorokraik, simu bainaka espesiál ida mai hosi “LALEHAN” nia matan-been ne’ebé hanaran “LALUBUR”.

Lalehan tanis. Udan-boot monu rai. Bee-mota be suli tuir Mota Maloa, baibain suli tuir no solur fo’er sira tama liu ba tasi. Maibé, iha loron ida ne’e, tanba bee-mota ia dalan ai-hun boboot sira sulan metin tiha iha mota nia ibun, bee’mota ne’e suli tama fali ba Palásiu Prezidente nia laran sai “Lalubur”.

Bee nakonu iha resintu laran hanesan bee-lihun ida. Merak be merak. Baibain, hosi loron ba loron, bainaka importante sira hosi rai ka rai laran mak vizita Prezidente Repúblika, maibé iha sesta lorokraik ne’eba, bainaka espesiál “Lalubur” mak ba vizita fali Nai Prezidente Repúblika.

“Ohin de’it mak situasaun seidauk admite. Tanba ne’e, Prezidente Repúblika sei serbisu nafatin maibé iha de’it ninia rezidénsia. Aban, Prezidente Repúblika tama ona, atu hala’o ninia serbisu hanesan baibain iha palásiu. Ami tenta esforsu atu serbisu to’o kalan, atu bele halo moos,” dehan Xefe Kaza Sivíl, Francisco Maria de Vasconcelos, ba jornalista sira iha Palásiu Prezidente Nicolau Lobato, Dili, segunda (16/3/2020).

Tanba, lalubur ne’e husik hela taho be dodok no dodook mak oras ne’e daudaun, ekipa ne’ebé hamoos iha área palásiu sei halo esforsu másimu atu bele halo limpeza jerál, nune’e aban bele ramata.

Trabailadores sira akompana husi PNTL hamos hela tahu iha areadores no baleta iha Palacio Prezidente nia oin, hafoin udan horseik halo mota maloa intupidu hodi be no tahu tama hotu iha Palacio Prezidente nian.Imajen/Antonio Goncalves

“Ami buka esforsu atu halo iha loron ida-rua ne’e tenke ramata. Hafoin inundasaun iha sesta liubá, ami hahú kedas halo serbisu no horiseik ami halo limpeza. Ita haree katak inundasaun ida-ne’e mak todan liu hotu kompara ho tinan sira liubá kotuk. Tanba ne’e, ami-nia previzaun loron rua tan hanesan ne’e ami sei hamoos hotu,” nia haktuir.

Iha oportunidade ida-ne’e, nia hato’o gradesimentu ba parte Ministériu Obra Públika (MOP) ne’ebé mak fó apoiu, bombeiru sira mai rega, no mós setór privadu HAKSOLOK, Lda, mai fó apoiu hodi hamoos taho-nurak sira ne’e.

“Hanesan Xefe Kaza Sivíl hakarak hato’o obrigadu wa’in ba sira no mós ba populasaun ne’ebé mak besik iha-ne’e, mezmu sira la mai iha-ne’e, maibé, sira halo esforsu hodi taka bee nune’e bee labele tama mai iha resintu Palásiu Prezidente Republika nian ne’e”, nia agradese.

Agradese mós, nia hatutan, inundasaun ne’e la estraga sasán barak maibé estraga de’it sasán uituan mak hanesan sasán sira apoiu umanitáriu nian ne’ebé rai iha armazén palásiu nian mak hetan estragu mak hanesan foos no supermie balun.

“Iha palásiu rasik tanba aas uituan, nune’e bee la konsege tama to’o iha laran,” nia subliña.

Iha segunda (16/3/2020) dadeersan ne’e, tuir Ajénsia TATOLI nia observasaun, ekipa bombeiru, funsionáriu palásiu PR nian, membru PNTL, seguransa sivíl, pesoál sira husi MOP, pasoál sira husi setór privadu HAKSOLOK, kontinua hala’o limpeza iha área palásiu prezidente tanba taho-nurak sei nafatin barak no barak.

Notísia Relevante: Ohin, Xefe Estadu Servisu iha Rezidénsia De’it

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here