Xefe Kaza Sivíl Prezidénsia Repúblika, Francisco Maria de Vasconcelos. Imajen Tatoli/Cipriano Colo

DILI, 16 marsu 2020 (TATOLI)–Ohin, Prezidente Repúblika (PR), Francisco Guterres Lú Olo obrigadu hala’o servisu iha rezidénsia Faról, Dili, tanba área Palásiu Prezidente Nicolau Lobato, Bairru Pité, sei nakonu ho tahu, hafoin inundasaun invade kauza husi udan-boot iha sesta, 13 marsu 2020.

“Ohin de’it mak situasaun seidauk admite. Tanba ne’e, Prezidente Repúblika sei serbisu nafatin, maibé, iha de’it ninia rezidénsia. Aban, Prezidente Repúblika tama ona, atu hala’o ninia serbisu hanesan baibain iha palásiu. Ami tenta esforsu atu servisu to’o kalan, atubele halo moos”, Xefe Kaza Sivíl, Francisco Maria de Vasconcelos hato’o lia hirak-ne’e, iha Palásiu Prezidente Nicolau Lobato, Dili.

Oras ne’e daudaun, ekipa ne’ebé hamoos iha área palásiu, sei halo esforsu másimu atubele halo limpeza, nune’e aban bele ramata.

“Ami buka esforsu atu halo iha loron ida-rua ne’e tenke ramata. Hafoin inundasaun iha sesta liubá, ami hahú kedas halo serbisu no horiseik ami halo limpeza. Ita haree katak inundasaun ida-ne’e mak todan liu hotu kompara ho tinan sira liubá kotuk. Tanba ne’e, ami-nia previzaun loron rua tan hanesan ne’e ami sei hamoos hotu”, Xefe Kaza Sivíl informa.

Kona-ba funsionamentu iha Prezidénsia Repúblika, Xefe Kaza Sivíl haktuir, la’o nafatin. Sira ne’ebé serbisu iha Gabinete Prezidente, Kaza Sivíl nian no mídia, sempre hala’o nafatin serbisu. Maibé, restu ne’ebé laiha atividade, hotu-hotu mai fó apoiu hodi halo limpeza iha área palásiu nian.

“Iha oportunidade ida-ne’e ami mós hakarak atu hato’o ami-nia agradesimentu ba parte Ministériu Obra Públika (MOP) ne’ebé mak fó apoiu, bombeiru sira mai rega, no mós setór privadu HAKSOLOK, Lda, mai fó apoiu hodi hamoos. Hanesan Xefe Kaza Sivíl hakarak hato’o obrigadu wa’in ba sira no mós ba populasaun ne’ebé mak besik iha-ne’e, mezmu sira la mai iha-ne’e, maibé, sira halo esforsu hodi taka bee nune’e bee labele tama mai iha-ne’e”, nia agradese.

Kona-ba sasán ne’ebé hetan estragu, Xefe Kaza Sivíl informa, iha sasán uitoan de’it, mak hanesan sasán sira apoiu umanitáriu ne’ebé rai iha armazén palásiu nian mak hetan estragu, hanesan foos no supermie balun.

“Iha palásiu rasik tanba aas uitoan, nune’e bee la konsege tama to’o iha laran”, nia subliña.

Tuir observasaun jornalista Tatoli, oras ne’e ekipa bombeiru, funsionáriu palásiu PR nian, membru PNTL, seguransa sivíl, pesoál sira husi MOP, pasoál sira husi setór privadu HAKSOLOK, kontinua halo limpeza iha área palásiu.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here