Imajen Tatoli/Osória Marques

DILI, 16 marsu 2020 (TATOLI)–Diretór Ezekutivu Centro Nacional Chega (CNC), Hugo Maria Fernandes hateten, inundasaun ne’ebé akontese iha sesta (13/3/2020) ne’ebé afeta bee tama edifisiu CNC, la estraga dokumentu importante sira ka dokumentu istóriku Timor-Leste ne’ebé arkiva iha fatin refere.

Maibe, nia hatutan, iha estragu balun ne’ebé mak akontese duni liuliu ba livru publiksaun sira ne’ebé la konsege salva tanba ema hotu-hotu konsentra salva mak arkivu istóriku Timor-Leste nian.

“Iha livru balu ne’ebé mak ami la konsege salva tanba ami hotu-hotu konsentra salva arkivu istóriku sira. Dokumentu istóriku Timor-Leste  nian la iha ida hetan estragus. Hotu-hotu seguru no iha kondisaun ne’ebé di’ak,” dehan Diretór Ezekutivu CNC, Hugo Mafia Fernandes, ba Ajénsia TATOLI liuhosi entrevista iha nia knaar fatin CNC, Balide, Dili, segunda (16/3/2020).

Nia hateten, relatóriu no dokumentu sira inklui Digital Vesrsatile  Disc (DVD) ne’ebé mak CNC ho Comissão de Acolhimento, Verdade e Reconçiliação (CAVR) durante ne’e prodús mak la konsege salva hamutuk 647 no DVD 200 maibé sei iha kopia.

“Iha relatóriu Chega! nian ne’ebé ami imprime ona no seidauk distribuí mak hetan estragus no mós relatóriu atividade Chega! nian loron-loron no finansa nian maibé nia kopia sei iha, ne’ebé laiha problema,” nia haktuir.

Enjerál, nia dehan, kondisaun edifísiu fizikamente la estraga no ezebisaun permanente mós di’ak hotu maske udan-been tama to’o laran.

Diretór ne’e realsa, nia parte iha ona desizaun ruma para halo prevensaun ba arkivu istóriku Timor-Leste nian ne’ebé liu rihun 30 mak arkiva hela iha edifisiu Centro Nacional Chega ne’e.

“Ami iha hanoin ona atu oinsá halo prevensaun tanba ita hotu hatene katak ita-nia arkivu iha CNC mais de 30 mil,” nia relata.

Aleinde ne’e, nia dehan, temporáriamente sira muda odamatan boot tanba odamatan nia oin hasoru loos eatrada entaun bainhira udan konserteza bee tama ba laran.

Ba ida ne;e, nia haktuir, CNC mós sei kolabora ho komunidade sira ne’ebé iha hela CNC nia kotuk hodi oinsá loke bee-dalan ida nune’e udan-been la’o tuir nia dalan.

Notísia Relevante: CNC Presiza Kondisaun Tolu atu Lori Dokumentu Importante Hosi Estranjeiru

Jornalista : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here