Prezidente FFTL, Francisco Jerónimo. Imajen Mídia FFTL

DILI, 16 marsu 2020 (TATOLI)-Prezidente Federasaun Futeból Timor-Leste, Francisco Gerónimo ho Prezidente Liga Futeból Amadora (LFA), Nilton Gusmão, iha sabadu (14/03/2020), halo ona deskusaun ida atu oinsá ajusta planu entre instituisaun rua ne’e hodi dezenvolve desportu liliu iha área futeból iha Timor-Leste.

“Parte rua tuur hamutuk ne’e hodi ko’alia oinsá mak halo ajustamentu ba futeból iha futuru, tau iha buat ne’ebé LFA lá presiza tau iha federasaun, LFA nafatin hamrik hanesan orgaun independente ida no ami-na’in rua ko’alia ba malu buat barak maibé desizaun ikus iha kongresu LFA mak deside,”informa Prezidente FFTL ba jornalista sira iha edifísiu FFTL, Bairu Formosa Dili.

Notísia Relevante :SEJD, FFTL ho LFA Seidauk iha Solusaun ba Polémika

FFTL sei hato’o pedidu ida ba Federation International Football Asosiated (FIFA)  hodi husu péritu balun atu tulun FFTL no LFA hodi dezenvolve futeból iha Timor-Leste.

“Ami konkorda malu ona, ida ne’e mak ami lao ba futuru ita sei haree hamutuk saida mak di’ak tau hamutuk ida ne’ebé lá di’ak no lá presiza tenke tau iha nia fatin,”tenik Francisco.

Nia hateten, LFA dadaun ne’e rekoñese nafatin FFTL hanesan organizasaun ida ne’ebé sira presiza atu tutela ba maibé LFA maka sei organiza jogu futeból sira.

Iha biban hanesan Prezidente LFA, Nilton Gusmão hateten, Liga Futeból Amadora hanesan orgaun ezekutadór programa desportu sira.

Prezidente Liga Futeból Amadora (LFA), Nilton Gusmão. Imajen dok. TATOLI

“Maibé buat ida dehan integra ka lá integra la’ós ida ne’e mak ita mai ko’alia, buat ida ita  ko’alia ne’e mak armonizasaun servisu entre federasaun no LFA, liga ne’e kontinua mantein hanesan orgaun independente ida maibé iha servisu balun ne’ebé labele organiza iha liga maibé organiza iha federasaun nia okos entaun ida ne’e mak ita buka atu ajusta,” katak Nilton.

Ema númeru ida iha LFA ne’e akresenta, sorumutuk ne’e ho objetivu atu hadia futeból iha Timor-Leste.

“Ohin ami konkorda buat barak maibé finál LFA iha nia membru asosiadu sira iha kongresu ba mak deside,”nia subliña.

Tuir planu kongresu LFA  sei realiza iha loron 21 fulan-marsu iha salaun Suai Room Timor Plaza Dili.

Jornalista : Hortencio Sanchez

Editór        : Agapito dos Santos

HAKEREK NO HATÁN

Please enter your comment!
Please enter your name here