Imajen Tatoli/Osória Marques

DILI, 16 marsu 2020 (TATOLI)–Diretór Ezekutivu Centro Nacional Chega (CNC), Hugo Maria Fernandes informa, to’o agora CNC seidauk iha armazén hodi rai arkivu istóriku Timor-Leste nian, entaun nia parte husu ba Governu atu harii sentru arkivu foun.

“Chega nia planu uluk kedas mak primeiru halo armazén ida ba arkivu istóriku Timor-Leste nian tanba CNC seidauk iha armazén tanba durante ne’e arkivu sira rai de’it iha fatin serbisu nian no fatin serbisu rasik mós limitadu,” dehan Hugo Maria Fernandes ba Ajénsia TATOLI liuhosi entrevista iha nia knar fatin CNC, Antigu Komarka, Balide, Dili, segunda (16/3/2020).

Tanba ne’e, nia hatutan, CNC presiza iha sentru arkivu foun ida tanba durante ne’e uza de’it mak sela komarka Balide nian ne’ebé mak haree husi aspetu seguransa ladún di’ak.

Nia hatutan, la’ós haree seguransa inundasaun maibé haree mós ba dezastre seluk purezemplu hanesan ahi-han ka erru umanu ruma. Tanba ne’e, presiza mós apoiu husi Governu hodi harii sentru arkivu foun ruma ne’ebe seguru hosi dezastre ruma.

“Entaun, ami hanoin presiza apoiu ruma husu Governu atu harii sentru arkivu foun ida para tau iha oin, nune’e akontese buat ruma fasil ba ita atu hasai,” nia husu.

Ba kestaun refere, nia hatutan, daudaun ne’e CNC hanoin no elabora hela relatóriu no hato’o proposta ba Governu nune’e hetan apoiu ruma para iha tinan ida ne’e tenke harii sentru arkivu foun.

“Atu salva arkivu istóriku ne’e, ami hanoin muda fali ba oin. Tanba iha oin fatin luan. Nune’e, bainhira mosu dezastre ruma fasil ba ita atu halo prevensaun ba dokumentu,” nia esplika. ujere.

Notísia Relevante: Inundasaun La Estraga Dokumentu Istóriku Timor-Leste iha CNC

Jornalista : Osória Marques

Editór     : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here