Diretora Ezekutiva Fundasaun Alola, Maria Imaculada Guterres. Imajen/ Egas Cristovão.

DILI, 12 marsu 2020 (TATOLI)–Diretora Fundasaun Alola, Maria Imaculada Guterres hateten, autór ba kazu infantisídiu ne’ebé durante ne’e akontese tenke presiza mekanizmu apropriadu no rigorozu ba sira atu prevene krime.

“Hanesan ita hatene krime infantisídiu nu’udar krime ne’ebé sériu. Tanba ne’e, presiza trata ho mekanizmu ida ne’ebé apropriadu no rigorozu atu prevene krime infantisídiu no salva labarik sira-nia vida durante partu ka hafoin partu,” dehan Maria Imaculada Guterres, ba jornalista sira hafoin hala’o semináriu nasionál ba selebrasaun loron feto mundiál ho tema “”Ha’u Mak Jerasaun Igualidade: Realiza Feto Nia Direitu no Asegura Igualidade no Asaun Prevensaun ba Kazu Infantisidíu” iha Salaun Komisaun Nasionál  Eleisaun (CNE), Dili, kinta (12/3/2020).

Nia hatutan, mezmu iha ona lei ne’ebé proteze labarik sira-nia direitu no kriminaliza hodi penaliza ona maibé prátika infantisídiu kontinua akontese ho númeru ne’ebé as liután.

Tanba ne’e, nia dehan, atu proteje no prevene krime  ba kazu infatisídiu ne’ebé ikus-ikus ne’e akontese barak no buras iha komunidade nia leet, presiza iha kolaborasaun husi entidade hotu.

Diretora ne’e dehan, ba autór sira ne’ebé kona kazu infatisídiu labele feto de’it mak sai autór maibé mane mós tenke sai autór hotu.

Tanba, nia haktuir, sira-na’in rua feto ho mane ne’e hamutuk mak labarik iha no hamosu kazu ne’e, ne’ebé tenke tuir justisa legál no lei ne’ebe vigora iha Timor-Leste.

“Ita desimina informasaun kona-ba kazu infantisídiu ne’e rasik katak ida ne’e kazu ida ne’ebé krime sériu presiza atu kombate no presiza atu kondena ba autór kazu infantesídiu. Maibé, la’ós de’it ba feto maibé presiza haree mós ba mane,” nia dehan.

Tanba, nia esplika, durante kazu infantisídiu ne’e ema hanoin feto de’it mak sai autór tanba feto sira mak hahoris labarik no sira mak estraga ka oho labarik. Maibé, realidade feto dala-ruma halo ida ne’e tanba iha situasaun balu ne’ebé feto sente todan tebe-tebes.

“Entaun ita presiza tebes autór ne’e, la’os de’it feto. Maibé, tanba iha feto no mane mak hafoin iha oan, entaun autór ne’e presiza hotu feto no mós ba hare igualidade jéneru ne’ebé tenke tuir justisa legál no lei ne’ebe vigora iha Timor-Leste,” nia esplika.

Nia esplika, hosi parte advokásia, Fundasaun Alola ba oin sei presiza haforsa liutan ba kazu infatisídiu ne’ebé kontinua akontese. Tanba ne’e, ohin  bolu entidades sira hanesan husi Ministériu Públika ho mós husi Tribunal ninian, atu bele fahe mós matenek no esperénsia, oinsá mak sira atende kazu sira ne’e.

“Ohin, ami liu husi grupu advokasia nasionál konsidera loron ohin halo semináriu ba loron internasionál feto nian ne’ebé mak baibain selebra iha loron 8 fulan marsu. Ami hanoin sei presiza tanba ne’e entidades hotu iha ne’e atu oinsá loke ita-nia hanoin no aumenta ita-nia koñsementu tanba asuntu ida ne’e krime sériu. Entaun, presiza atua lalais no responde tuir prosesu  justisa  legál iha Timor-Leste no ita-nia lei sira iha haree ba autór rua feto no mane hotu,” nia subliña.

Notísia Relevante: Halakon Kazu Abandonu no Infantisídiu Presiza Ema Hotu Nia Kolabarasaun

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here