Luis Roberto, Deputadu Bankada KHUNTO

DILI, 13 marsu 2020 (TATOLI)—Vise-Prezidente Parlamentu Nasionál, Luis Roberto hateten, Parlamentu Nasionál (PN) sei bolu Governu liuhosi Ministériu Saúde no intituisaun relevante sira hodi halo esplikasaun kona-ba preparasaun fatin ba prevensaun Coronavirus.

“Ajenda importante ida maka sei konvida Ministériu Saúde, Ministériu Finansa no instituisaun relevante sira atu halo diskusaun kona-ba coronavirus nian, ne’ebé durante ne’e iha fatin lubuk ida mak governu deside ona maibé ita-nia populasaun sira rezeita,” dehan Vise-Prezidente Parlamentu Nasionál, Luis Roberto, ba jornalista sira iha Parlamentu Nasionál, sesta ne’e.

Vise-Prezidente Parlamentu Nasionál ne’e informa, populasaun rezeita tanba falta halo sensibilizasaun kona-ba moras ne’e hosi Governu rasik, tan ne’e presiza sensibiliza didi’ak asuntu ne’e ba komunidade sira.

Luis Roberto dehan, ajenda importante ida-ne’e líder bankada sira aprova iha Parlamentu Nasionál, kinta, horiseshik.

Nia dehan, razaun Parlamentu Nasionál bolu governu tanba Coronavirus ne’e kestaun mundiál no nasaun viziñu sira mós afeta ona, tanba ne’e Timor-Leste tenke halo antesipasaun no presiza iha fatin izolamentu.

“Karik iha vítima coronavirus tenke izola iha fatin ne’ebé ita prepara, ne’e mak sai hanesan hodi husu esplikasaun governu nian ba asuntu ida-ne’e,” nia dehan.

Vise-Prezidente Parlamentu Nasionál ne’e fó-sai, katak, ajenda importante ida-ne’e sei realiza iha loron segunda no tersa, semana oin.

Notísia Relevante: Prevene Coronavirus, Governu Halo Preparasaun iha Fatin Tolu

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here