Imajen Espesiál

DILI, 13 marsu 2020 (TATOLI)—Udan-boot ne’ebé akontese iha sesta (13/3/2020) hamosu lalubur iha Dili parte leste nian. Dili tanis. Komunidade sira ne’ebé hela iha Becuse tanis tanba bee-mota tama sira-nia uma, mota lori ema, no labarik mane ida mout no mate iha Mota Taibesi nian.

Labarik mane ida ho naran Alegria Bento, idade 16, sai vítima ba udan-boot ne’e. Baibain ema bolu Aleky. Nia hela iha iha Berbidu. Horisehik lorokraik, nia mout iha mota Taibessi, iha área ponte foun, iha tuku 15.00 lorokraik.

Hafoin komunidade sira foti sai Aleky hosi mota laran, Aleky nia kondisaun iis sei iha, liman ain mamar no roupa la belit ona iha isin-lolon. Tanba, bee-mota suli no tebe makaas, lori sasorut vítima nia roupa lakon hosi nian isin-lolon.

Hafoin ne’e, komunidade no família sira foti sai Aleky hodi taka ho plastik. Tanba hateke ba mai, rai sai mamuk no fuik, família sira lori evakua vítima ho motor lori halai ba Klinika Becora. Maibé, la konsege salva tanba to’o iha klinika vitima hakotu iis ona.

“Alin mane ne’e no nia oan feto, inklui viziñu balun ba halo kartaun eleitorál. Dadeersan, sira ba tiha ona no ema dehan tuku rua ba fali. Tuku rua sira ba fali udan boot. Ha’u-nia oan feto ba no sira-na’in hira la ba. Maibé, hamriik hela iha meubel oin besik ponte, tanba udan. Sira hamriik hela iha meubel oin, inklui ha’u-nia maun nia oan sai eskola mai, sira hamriik iha meubel oin ho mos viziñu balun. Alin mane sira halai ba dehan ponte tohar no ha’u mós halai tun mai, haree mota nee ai nakonu ona. Halo mota fahe ba rua fali no sasorut sira halai la di’ak ona,” sasin Teresinha Maia, hanesan Família husi matebian ne’e haktuir ba Ajensia TATOLI iha Klinika Becora, sesta (13/3/2020) kalan.

Ho laran triste no ho neon tanis, Teresinha Maia haktuir ho lian metin de’it iha nia kakorok talin. Kleur, nia nonook no hafoin mak haktuir fali istória ne’e.

“Tia ida ho nia oan nurak, hau-nia subriñu no hau-nia alin ne’e salva tiha Tia ne’e ho nia oan sai hosi mota, entaun ha’u-nia subriñu ne’e kalen meubel nian baku fila mai, nia kaer kalen, nia atu kaer nia tiu ne’e, la di’ak ona. Tanba mota sasorut no bee suli-tebe tan, ha’u-nia subriñu ne’e. Prontu, sira na’in rua husik malu ona. Nia ho labarik feto rua mak mota lori,” Familia vitima, Teresinha Maia, haktuir.

Família vitima ne’e relata, alin sira mós la hetene mota ohin makaas hanesan ne’e. Tanba, ohin, mota mai nakonu tiha no mota fahe ba rua. Mota lori ai-boboot sira iha leten tun hotu mai, ai sira ne’e tahan tiha ponte okos metin, entaun mota ne’e tuun loos, la di’ak no mota fahe ba sanak rua tiha.

“Ha’u-nia subriñu ho alin feto tomboy ne’e, sira-na’in rua sai. Sorte kalen mak tahan, se lae, ohin iha uma laran, ami-nia uma na’in hira mate hotu,” nia informa.

Teresinha Maia haktuir, akontesimentu udan-boot iha tuku 15.40, mota lori feto na’in rua inklui subriñu mota lori makaas liu, vítima ida belit hela iha ai, ida mota lori liu, ida subriñu ne’e bee sei lori ba mout hela, agora akontese hanesan ne’e.

“Kolega feto rua seluk ne’ebé mout hamutuk ho subriñu ne’e, ha’u la hatene hetan ona ka lae,” nia dehan.

Iha parte seluk, Doutora Luisa de Oiliveira Gama hateten, família sira lori alin ne’e to’o iha Klinika Becora iha tuku 18.00 lokraik ho kondisaun la iha iis ona.

“Alin mane ne’e, sira lori mai to’o iha klinika Becora ho kondisaun iis la iha ona. Entaun, hosi parte ami-nia haree hanesan ne’e. Ami labele halo buat ida tanba ho kondisaun ne’ebé la iha ona iis,” nia dehan.

Nia reforsa, ho kondisaun hanesan ne’e, husi parte klinika entrega fali ba família tanba alin ne’e ho kondisaun iis la iha ona.

Notísia Relevante: Lalehan Tanis, Bee-Mota Sobu Eis-Merkadu Becora

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here