Ekipamentu pezadu husi empreza Montana Di'ak suru taho-teen iha estrada Bidau. Imajen TATOLI/Maria Auxiliadora.

DILI, 14 marsu 2020 (TATOLI) – Eis Primeiru-Ministru Kay Rala Xanana Gusmão orienta ekipamentu pezadu rua (2) hosi empreza Montana Di’ak hodi hamoos taho ne’ebé nakonu iha estrada boot Bidau Akadiruhun.

Iha dadeer ne’e, ambitante suku Bidau Akadiruhun ida-idak preokupada ho atividade limpeza hafoin udan-boot ne’ebé akontese iha sesta loraik ne’e, lori inundasaun ne’ebé afeta tebes ba sira-nia rezidénsia, loja, kioske, restaurante, ofisina no seluk tan.

Xefe Suku Akadiruhun, Juvenal da Conceição hatete, dezde tuku lima dadersán hahú mobiliza ona joven no rezidente suku refere hodi hamoos fatin sira ne’ebé nakonu ho lixu no taho.

“Ami serbisu hamutuk ho Avó Nana nia ekipamentu atu hadi’a fali dalan. Ne’ebé sira suru hela rai ne’e (taho-teen). Ekipamentu husi kompañia Montana Di’ak. Ne’e orintasaun husi avó Nana”, autoridade suku ne’e afirma.

Nia dehan, aldeia tolu husi suku ne’e ho totál populasaun hamutuk 3870 sofre hotu ba dezastre naturál ne’ebé akontese.

Tanba ne’e, Xefe Suku orienta ona nia Xefe Aldeia sira atu foti dadus ba vítima sira ne’ebé afetada.

“Ami koopera ho administradór para bele foti dadus ne’ebé loos. Lakohi aban-bainrua populasaun balun krítika ami,” nia hateten.

Entantu, abitante suku refere lakohi fó komentáriu ho situasaun ne’ebé hasoru. “Agora hanesan ne’e, ha’u atu dehan saida. Haree de’it ona tanba fatin hanesan ne’e tiha ona”, vendedór ne’e dehan.

Aléinde ne’e, iha Suku Bidau Mota Klaran afeta tebes mós ba inundasaun no rezidente sira halo limpeza ba fatin afetadu sira.

Tuir observasaun, depois udan para, iha sábadu ne’e, kapitál Díli nakonu ho taho, lixu no rai-rahun ne’ebé suar maka’as no hamosu engarafamentu ida fatin balun.

Notísia Reelevante: Lalehan Tanis, Bee-Mota Sobu Eis-Merkadu Becora

Jornalista : Maria Auxiliadora

Editór : Cancio Ximenes

HAKEREK NO HATÁN

Please enter your comment!
Please enter your name here