DILI, 09 marsu 2020 (TATOLI)–Tuir Diretór Diresaun Nasionál Organizasaun Urbana, Hermínio Moniz Ribeiro hateten. iha tinan 2019 Governu Timor-Leste hetan reseita publisidade hamutuk $144.147 husi setór privadu sira liuhosi publisidade.
“Reseita publisidade ne’ebé tama ba kofre estadu nian hamutuk $144.147 maibé la inklui ho publisidade munisípiu 11 inklui Rejiaun Administrativu Espesiál Oé-Cusse Ambeno nian,” dehan Diretór Diresaun Nasionál Organizasaun Urbana, Hermínio Moniz Ribeiro ba Ajensia TATOLI liuhosi entrevista iha nia knaar fatin, Caicoli, Dili, segunda (09/3/2020).
Relasiona ho preokupasaun públiku nian kona-ba publisidade “Oppo” nakonu Aeroportu Internasional Nicolau Lobato, nia hatán, publisidade Oppo nian ne’ebé mak kompania sira tau iha Aeroportu Nicolau Lobato nian ne’e hetan ona autorizasaun hodi kompañia sé de’it bele tau publisidade iha ne’ebá.
“Bainhira ita presiza katak programa Governu iha mak hasai no tau fali publisidade Governu nian,” nia hateten.
Publisidade Oppo tau iha Aeroportu Nicolau Lobato, nia esplika, tanba sira selu no reseita ba kofre estadu nian maibé enkuantu la taka dalan ba Governu bainhira Governu hakarak tau publisidade Governu nian.
Aleinde ne’e, nia hateten, Governu fó autorizasaun ba setór privadu ka empreza ne’ebé de’it bele monta ninia publisidade iha fatin públiku ka avenida tanba Governu hetan taxa hosi sira-nia publisidade ne’e.
Maibé, tuir nia, bainhira Governu iha planu atu monta publisidade entaun iha loron 30 antes Governu hatete ba empreza ka kompañia atu hasai sira-nia publisidade.
“Governu fó autorizasun ba empreza sira ne’ebé hakarak tau nia publisidade iha avenida tanba ita hetan taxa hosi sira-nia publisidade. Bainhira ami presiza atu tau promosaun ruma kona ba programa Governu nian entaun setór privadu tenke hasai tiha pubilisidade ne’ebé mak sira tau maibé ami dehan ba sira antes loron 30,” nia esplika.
Notísia Relevante: Janeiru-Fevereiru, MAE Hatama Reseita $8.794 ba Kofre Estadu
Jornalista : Osória Marques
Editór : Cancio Ximenes
