Janeiru-Fevereiru, MAE Hatama Reseita $8.794 ba Kofre Estadu
DIlI, 10 marsu 2020 (TATOLI)–Diretór Diresaun Nasionál Organizasaun Urbana (DNOU), Hermínio Moniz Ribeiro hateten, iha fulan janeiru-fevereiru 2020, Ministériu Adminstrasaun Estatal (MAE) hatama ona reseita hamutuk $8.794 ba kofre Estadu ne’ebé halibur hosi estasionamenetu hitu ne’ebé estabelese iha Munisípiu Dili.
“Reseita ba estasionamentu iha sidade Dili nian ne’ebé mak ami hatama osan ba kofre Estadu ho montante $8.794 ne’ebé kobre husi estasionamentu hitu hanesan Merkadu Taibessi, Colmera, Avenida Liberdade Imprensa, Avenida 25 de Abríl, Travessa Tafui, Jardín 5 de Maio no Avenida 25 de Maio”, dehan diretór ba jornalista tatoli iha nia knaar fatin, Caicoli, Dili, ohin.
Estasionamentu ne’e, nia informa, eziste durante tinan tolu ona ne’ebé hahú husi 2017-2020.
Nia dehan, iha tinan 2017-2020, MAE halibur reseita hamutuk $73.393.60 ne’ebé kompostu hosi tinan 2017 halibur $747,00, tinan 2018 halibur reseita hamutuk $27.834,7, tinan 2019 hamutuk $27.015,05 no tinan 2020 halibur reseita hamutuk $$8.794.
Nia hatutan, iha tinan 2017, estasionamentu foin estabelese de’it iha merkadu Taibessi no iha tinan 2018 Munisípiu Dili haree no aumenta tan ba iha estasionamentu Colmera.
Iha 2019, nia dehan, Munisípiu Dili implementa tan estasionamentu iha Avenida Liberdade Imprensa, Rua 25 de Abril, Travessa Tafui, Jardin 5 de Maio no Avenida 20 de Maio.
Maibé, nia informa, iha tinan ne’e ministériu relevante liuhosi Munisípiu Dili iha planu atu implementa tan estasionamentu iha jardin Bebora, jardin Motael no mós planu atu tau estasionementu ida iha Suku Kampung Alor nian.
“Ami hakarak atu estabelese ida iha Kampung Alor nian tanba ami haree fatin ne’e besik Igreja Musulmanu no iha ofisina balun iha ne’ebá hodi nune’e labele hamosu engarrafamentu ba movimentu ema ho transporte públiku,” nia esplika.
Jornalista : Osória Marques
Editór : Cancio Ximenes
