Espoza Prezidente Repúblika, Cidália Lopes Nobre Mouzinho Guterres. Imajen TATOLI/Osória Marques.

DILI, 12 marsu 2020 (TATOLI)–Gabinete Apoiu Atividade Konjuje Prezidente Repúblika (DAAC-sigla Portugés) serbisu hamutuk ho Plan Internasionál iha inisiativa ba eventu Loron Feto Mundiál ho objetivu prisinpál atu hala’o selebrasaun hodi reforsa no valoriza kontribuisaun ema ida-ida liuliu feto nia esforsu koletivu atubele atinje mudansa ne’ebé sustentável.

“Ita kolabora ho Plan internasionál TL hodi hala’o selebrasaun loron feto internasionál iha 8 marsu hodi reforsa no valoriza kontribuisaun ema ida-idak hodi atinje ba mudansa ne’ebé sustentável,” dehan Espoza Prezidente Repúblika, Cidália Lopez Nobre Mouzinho Guterres, iha nia deskursu hafoin partisipa Loron Mundiál feto iha  Palásiu Nobre Lahane, Dili, ohin.

Nia hatutan, bazeia ba tema loron mundiál ba feto ne’ebé hateten “Ha’u Mak Jerasaun Ba Igualdade” ida-ne’e mak husu ba ema ida-idak hodi fó kontribuisaun no promove hodi mobiliza hamutuk igualdade espíritu direitu feto nian iha Timor-Leste.

“Loron ida-ne’e, lori Ita hotu ba hatene no lembra fali istória eroina sira-nian durante sira luta iha tinan 1975-2020. Liuliu partisipa foti desizaun ba igualdade entaun ho ida-ne’e nasaun unida lori loron ida-ne’e hodi sai hanesan Loron Mundiál Feto hodi dedika no fó onra ba progresu ne’ebé feto sira hetan hodi luta kombate ba dezigualdade no reklama feto nia direitu,” nia hatutan.

Relasiona ho Loron Mundiál Feto, espoza Prezidente informa ba ema hotu katak hamutuk hodi haree mundu seguru no feto ho nesesidade espesiál hodi atinje dezenvolvimentu sustentável iha TL.

“Mai ita hamutuk hodi haree mundu ne’ebé seguru ho hakmatek no saudável hodi ba nesesidade espesiál hodi atinje dezenvolvimentu sustentável iha TL,” espoza informa.

Espoza PR mós sei fó rekoñesementu ba permisaun ba eroina no eroi sira ne’ebé dedika no kontribui ba mudansa signifikante iha Timor-Leste.

Nia dehan, eventu refere sei bolu atensaun ba ema hotu-hotu ne’ebé luta ba igualdade jéneru no iha balun ne’ebé mak foin hola parte. Maibé, atu foti asaun agora hosi ema ida-idak ba mundu ne’ebé iguál no justu ba feto, labarik-feto no ba mane inklui maluk sira ho nesesidade espesiál.

Partisipante ba semináriu husi membru Parlamentu Nasionál, membru VIII Governu, eis-titulâr sira, sosiedade sivíl, korpu diplomátiku, relijiozu/a no mós estudante sekundária no universitáriu TL.

Notísia Relevante: Aban, TL Sei Selebra Loron Feto Internasionál iha Ermera

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here